Mizo a saphun leh ngawt zel hi ngaihtuah chian a ngai
Kan sorkarah contract hna hmu thei em em mai Kamlova Chhangte an tih a awm a. MNF party lam workers te chuan anmahni aia tlatlum zawk niin an hria a. A hna hmuh pawh titi ber pakhatah an nei bawk. Amah hi an hmelhriat vak loh avangin an han chhui chiang a. Vaipa Kamrula an tih, mizo hnama saphun, contractor a tribal nihna certificate nena lo in register thlap a lo ni reng mai a. Chief minister laina hnai anih avangin a langa pau chuan an sawisel hreh hle.
Mahse a hna hmuh theih em avang chuan an ngawihbosan thei mai lo. Social media thlengin a langsar ta em em a. A hna hmuhte chu an tarlang chuai chuai a. Thawh pawh a lo thawk nasa ngiang mai.
Hetiang hi a lo nih takah chuan itsikna, thikna a lo piang chho a. Hei hi mihring zia dik tak pawh a ni. Mi tam takin hetianga vaiin mizoah sa a phun hi kawnghmang ni theiin an hre lova. Central YMA thlengin ngaihmawhna a lo piang ta. CYMA chuan hetianga saphun hi cancel vat anih loh chuan hun kal zelah a pawi thei dawnin an hria a. A lehpek awm tawh lo turin he vaipa saphunna pawh hi cancel an tum ta bawk.
Central YMA hma lakna hi mi thenkhatin politics vang emaw an lo ti mai thei. Hetianga mizo a sa an phun thei a nih a, tribal certificate an neih theih dawn phawt chuan vai tam takin mizo a saphun hi an duh ngei ang. India rama tribal te hamthatna hi a tam em em a. Hna zawnna atan ringawt pawh an duh fur ang a, mizorama an awm ngat chuan income tax an awl ringawt pawh thlakhlelhawm a tling ang. Phal a ni tih an hriat fuh laklawh chuan kan dang seng lovang a, kan chanvo min chuhpui tur kan lalut hum hum thei a ni. Chuvangin tuna YMA hmalakna hi a hlawhtlin ngei theih nan kan theihna laia kan tan theuh a tha ber awm e.