February 11, 2022 tlai lam khan Excise & Narcotics Department (END) leh BSF (Sector Hqrs BSF Intelligence Unit, Durtlang, 38th Bn. BSF Sakawrtuichhun leh Frontier Hqrs, Silchar, Assam) thawkdunin Vairengte dai, North Chhimluangah methamphetamine (meth) thahnem tak an man.
North Chhimluang (NH – 306 / Aizawl to Silchar Road)-a methamphetamine an man hi kg 12 leh gram 800 a ni. A neitua puh mi pahnih – Shamir Deb (49), Sonai road, Silchar, Assam leh Solomon Zonunmawia (35), Myanmar-a khawsa nia inchhalte man nghal an ni.
Meth an manna hmun hi, North Chhimluang khaw daia Shamir Deb-a kudam luahna kawt niin, ruihhlo an inhlan tur nangchinga man an ni a. Heng meth an mante hi Myanmar atanga lak, state pawn lama hralh tura tih a nih thu END hotuten an sawi.
Meth an man neitua puh Shamir Deb hi kuhva sumdawnna nena sawi zawm a nih chungchangah, “Keini chuan kuhva sumdawnnaah a inhnamhnawih e, a inhnamhnawih lo e kan ti dawt thei lo. Amaherawhchu, kan thu hriat danin amah hrim hrim hi kudam nei a ni a. Hmarchate pawhin a sumdawng tawh thin a. Kuhva-ah chuan a sumdawng tan ve ngei nia sawi a ni,” tiin excise hotuten The Zozam Times zawhna an chhang.
Meth vanga mante hi dan tlawhchhanin Vairengte Excise & Narcotics station-ah thubuai ziah luh a ni a. Inrinni kalta khan magistrate hmaah hruai an ni a, meth vanga man pakhat zawk hi Covid-19 a kai avangin jail-ah dah luh ni loin, SOP zawmin ni riat hnuah thu zawh fiah leh turin magistrate-in siam remin, Thingdawla 3C-ah dah luh rih a ni.