Mizoram Assembly Budget Session, tun thla ni 22 atanga tan tur chuan March 10, 2022 thleng a awh dawn a. Assembly inkhawma put luh tur sorkarin dan siam tura a duan pakhat leh dan ding siam that tur pahnih a lut tawh.
Mizoram Legislative Assembly pariatna, session pakuana programme kimchang hi duan a ni tawh a. Session ni hmasa berah hian Larsap Hari Babu Kambhampati chuan dan pangngai angin thu a sawi ang a, a thusawia lawmthu sawina motion hi a tukah sawiho a ni ang.
Kum 2022-2023 atana Mizoram sum ruahman leh kumin sorkar kum chhunga sum indaih lohna phuhrukna tur, Supplementary Demand for 2021-2022 chu February 24-ah finance changtu, Chief Minister Zoramthanga’n a pharh ang a, February 28 leh March 1-ah a tlangpuia budget sawihona a ni ang a, March 2 atanga ni 9 thleng minister-te’n an department enkawlna tur sum an ruahman anga sawihona kalpui a ni ang.
Assembly thutkhawma put luh tur dan thar duan tur hi The Mizoram Market (Regulation & Facilitation) Bill, 2022 a ni a, The Mizoram Road Fund (Amendment) Bill, 2022 leh The Mizoram Fisheries (Second Amendment) Bill, 2022 te chu dan ding lai siam that tura lutte a ni a. Member mi mal bill – ‘The Private Transport Workers (Welfare) Bill, 2022’ chu Dr. Vanlalthlana’n assembly secretariat-ah a thehlut tawh bawk.
Assembly inkhawm laia house chhunga chhan tur chi zawhna (starred question) 468 a lut tawh a. Ziaka chhan chi (unstarred question) 258 a lut tawh bawk.