Katni district, Madhya Pradesh-a lei verh lai chima a chhunga tang thawktu mi panga chu chhanchhuah an ni tih Pathianni khan district thuneituten an sawi.
Sleemanabad-a tuikawng tur lei verh mek chimah hian thawktu mi pakua an tang a niin news agency ANI. chuan a tar lang.
Mi dang palite chhan chhuah hna pawh hi thawh mek zel a la ni a, Jabalpur atangin State Disaster Emergency Response Force (SDERF) team thleng tawhin anni puihna nen hian beih mek a ni.
“Thawktu tang mi pakua zinga panga chu him taka lak chhuah tawh an ni a, mi dang pali erawh lak chhuah theih an la ni lo va. SDERF team-in an bei mek zel a ni,” tiin thuneitu pakhat chuan a sawi tih ANI chuan a tar lang.
Madhya Pradesh Chief Minister Shivraj Singh Chouhan pawhin he thil thleng hi a ngaihven hle a, Katni District Collector Priyank Mishra hnen atangin an thlen chin a ngaichang reng.
Chouhan-a hian hliam tuarte chu tha taka enkawl turin thuneitute chu a chah nghal a. Twitter-ah chief minister hian district thuneitute nen an inbe reng a, tuna tang mekte tan pawh a tawngtai reng thu a tar lang.
SREDF team-in theihtawp chhuahin an bei mek a, an lak chhuah theih a beisei thu chief minister hian a tar lang bawk.
&&&&&