Siaha khaw chhunga New Colony III VC leh MTP chuan Inrinni khan thuthar thehdarhtute an kawm a, an veng chhung lei tlahniam vanga harsatna an tawh dante an sawi.
VC Vice president H.Hneiro chuan kum 1995 atang khan an veng lei a che tawh niin a sawi a, tunah hian 6/7 feet vela a hniam tawh thu leh kum tin feet 1 vela a hniam zel thu a sawi.
H.Hneiro, “Helai sinking area-a awmte hi zan khat thil thua inphum vek thei dinhmuna ding mek an ni a, furah tui takin an mu ngai lo,” a ti.
He lei tlahniam chungchangah hian sorkara thuneitute chuan hmalak dan tur enin an lo tlawh tawh thin a; mahse tun thlengin hlawhtlinna a awm lo tih sawiin, politician-te pawhin inthlan dawn apiangin campaign au hlaah an hmang a, an tlin hnuah erawh an ngaihsak zui tawh lo tih a sawi.
Hei vang hian tunah MADC-ah MDC inthlan a ni dawn a, eng party mahin he lei tlahniam chungchang hi campaign nan hmang tawh lo se tih an duh thu a sawi H.Hneiro chuan a sawi bawk.
New Colony III VC leh MTP hruaituten an sawi danin lei tlahniam huam chhungah hian chhungkaw 300 vel an awm a, furah chauh ni lovin thalah pawh a che a. In rauhsan ngai panga awm tawhin tunah hian J. Vabeingiachhi in chu tlu mai thei dinhmuna a din avangin mi tlawmngaiten an do nghehsak leh a ni.
Sinking area-a awm, In te hi nghet leh ngil taka ding a awm tawh mang lo a, veng danga inhmun dang nei lote an nih hlawm avangin hlau hle mah se an inte chu an chhuahsan hlei thei lo niin khawtlang hruaitute chuan an sawi a, sorkarin ngaihsak deuh se an duh thu an sawi bawk.