A nuar thei apiang nawrhna ram kan ni mai em?
Kan ram politics a kal fuh hlei thei lo a, a nuar thei apiang an nuar reng mai nite pawhin a lang. Tunah pawh sorkar hnathawk inzawmkhawm pawlte chuan nawrh bul tan an tum leh a, badge dum bel chungin bultan an tum leh ta bawk.
Sorkar hian pawisa a nei lo tih a chiang a, bill chhete te leh tlem deuh thlengin a hrek bet a, lak theih lohin a awm nual hlawm. Hei hi mimal hnena a batsakte pawh a ni a; tunah sorkar hnathawkte pawh an buai chho leh tan ta.
Sorkar hnathawk hrang hrang intelkhawmna Federation of Mizoram Government Employees & Workers (FMGEW) hian a hun taka sorkar hnathawk hlawh pe thin tur te, sorkar laipui hnathawkte DA rate ang pe tur leh pensioner-ten an chanvo, hamthatna an neih an hmuh thuai theih nana hma la turin Mizoram sorkar an lo ngen tawh thin a, Chief Minister Zoramthanga pawh hmaichhanah hmuhin an thil phutte tihlawhtling tura ngenin, ziak pawhin ngenna an lo thlen tawh thin. Sorkara an phut hrang hrangte tihhlawhtlin a nih mai loh avangin lungawi lohna lantir an tum a. February 11, 2022 (Zirtawpni) khan FMGEW Executive Committee an thukhawm a, FMGEW member zawng zawngin February 21-25 chhungin office-ah badge dum bel vek an rel ta a ni.
Sorkar hnathawkte thlengin harsatna an tawk chho ta hi a pawi a, sorkar hian ruahmanna a siam thuai thuai zel a nih loh chuan sum tlem te te thlenga harsatna a tawh chhoh hi a hlauhawm a, buaina zualpui a thlen hma ngei hian suma a harsatna hi chinfel dan a zawn thuai a ngai awm e.