Covid-19 chungchanga sorkar thupuangtu, Dr Pachuau Lalmalsawma chuan Mizoramah Covid-19 hri thar, Omicron vei mi 62 an awm tih finfiah a nih thu a sawi.
January thla khan Mizorama Covid-19 kai sample eng emaw zat chu hri thar an kai leh kai loh hriat nan National Insitute of Biomedical Genome (NIBMG), Kolkata-ah en dik tura thawn a ni a, sample an endik tawh result chu nimin khan health department-in a dawng.
Dr Pachuau Lalmalsawma chuan nimin khan result an dawnah Omicron vei an awm tih finfiah a nih thu hi chanchinbumite hmaah a puang a, “January thlaa sample kan thawn zinga 122 chu endik a ni tawh a, chung zinga 62-ah Omicron hi hmuh a ni,” a ti.
Omicron veite hi Aizawl district chhunga mi vek an nih thu sawiin, district dang – Khawzawl, Kolasib, Saitual leh Serchhip atanga sample an thawn zingah erawh Omicron hmuh a ni lo tih a sawi a. Hri thar dang, Delta 12 leh Delta Sub variant 18 hmuh a nih thu a sawi bawk.
Dr Pachuau Lalmalsawma chuan result an hmuh tlai chhan sawiin, “Laboratory-a thawkte zingah Covid-19 kai an awm nual vang a ni,” a ti a, Mizoramah Omicron kai an awm tih finfiah a nih takah chuan mipuite an fimkhur zual a tul tih a sawi.
January thlaa sample an thawn endik hmabakte chu endik chhunzawm zel a nih thu sawiin, “Tunah hian an endik leh mek a, result pawh kan dawn leh thuai kan beisei,” a ti.
The Zozam Times zawhna chhangin Dr Pachuau Lalmalsawma chuan February 12 khan Covid-19 kai sample 300 chu genome sequencing ti turin NIBMG, Kolkata-ah an thawn leh tih a sawi bawk.
Tar lan tawh thin angin Covid-19 variant hrang hrang finfiah theihna, Genome Sequencing Laboratory chu Zoram Medical College-ah bun ni tawh mah se tun thlengin hman theih a ni la ni lo a, hemi avang hian state pawnah sample-te hi endik a la ngai thin a ni.