Kolasib Dumluia Rs. nuai 52 senna project, Chakai Farm kalpui mek chu nimin khan Kolasib bialtu, Fisheries Minister K Lalrinliana leh thuthar thehdarhtuten an tlawh a. Minister chuan Chakai Farm chu enchhin mek a nih thu leh he project hi mualphopui huama siam a nih thu a sawi.
K Lalrinliana chuan farm-a chakai an dahte chu lui chakai an nih thu leh hmun bika khawiin engang chiahin nge an damkhawchhuah theih tihte hriat a la nih loh thu leh enchhin mek a nih thu a sawi a. Chakai farm kalpui a nih tan tirh atangin ICAR scientist Lalrinsanga’n a vilpui thu sawiin, he hmalakna hi National Fisheries Board-ah pawh an thlen tawh tih thuthar thehdarhtute chu a hrilh.
Fisheries minister chuan Mizote ngainat, chakaia intodelh tura hmalak chhinna atana chakai farm chu kalpui a nih thu a sawi a. Chakai chu sa zawng zawnga man to pawl a nih thu sawiin, “Rs. 300 man hi a sa la chhuak vek ila, vei khat emaw lek chauh a ni,” tiin, heti chung hian Mizote ngainat a nih avangin market lamah harsatna a awm an rin loh thu a sawi.
“Tuna chakai kan khawi dan ang tak hi India ram hmun dangah pawh tih a la ni ngai lo va, keimahni kutchhuak, kan ruahman chhin a ni a, a hlawhtlin chuan state dang pawhin an la rawn entawn tur a ni,” minister chuan a ti a. Chakai farm enchhina hmalak ni mah se, luidung humhalh kawngah pawh nasa zawka hmalak a nih tho tur thu a sawi bawk.