National Football League (NFL)-in thingthit an khap nia report awm karah Eminem chuan a tih tur a \hulh pah chuang lova, Super Bowl Halftime show-ah a thingthi rup mai.
Heti anga chetna hi American football league-ah sawih a hlawh. 49ers player Colin Kaepernick-a’n US-a chi leh chi inkara inthliarna awm thin leh police te chet dan dodal a, 2016 a national anthem sak laia a thingthit khan fan te leh politician te inkarah pawh ngaihdan in-an lohna nasa tak thlen zuiin, khatih laia president Trump ngei pawh a bang bik lo. 2017 ah Colin hi free agent-in a chhuak a, NFL-ah a khel zui tawh lo.
Los Angeles khawpuia February 13 zana SoFi Stadium-a Super Bowl Halftime Show neih ah Eminem hian ‘Lose Yourself’ hla a sak laiin a thingthi a; Dr. Dre, Snoop Dogg, Mary J Blidge, Kendrick Lamar leh 50 Cent te nen mipui an barakhaih hneh hle.
Eminem hian Colin hi a lo thlawp daih tawh a, 2017 kuma BET Hip Hop Awards-ah minute 4-5 freestyle pui rapthlak tak a chhamchhuak a, Detroit rapper hian, “F— that, this is for Colin, ball up a fist and keep that s— balled like Donald the b—-.” a ti.
New York Post tarlan danin, Eminem hnenah thingthi lo turin NFL lamin an ngen lova, player te hian 2016 atang khan zalenna neiin, musical performer te chungah thingthit vang maia hremna lekkawhna chhan tur a awm lo, tih a ni.