Ukraine chuan Russia leh Europe himna tura thawkho ram dangte chu tun hnaia ramria boruak sang tak awm mek tidai tura thutkhawmpui a tum.
Foreign Minister Dmytro Kuleba chuan Russia hian ramria an sipai an chhawp vak chungchanga sawipui tura a ngenna chu a hnawl tih a sawi.
A dawt leha an kal dan tur chu darkar 48 lo awm tur chhungin Russia-in inruahmanna a kalpui dan chu langtlang taka sawiho tura ngen leh a ni tih a sawi.
Russia hian Ukraine ramri hnaih takah sipai 1,00,000 vel zet chhawp mah se run tûmna a nei lo tih a la sawi reng.
Hetih lai hian United States chuan Moscow hian thlawhna atangin engtik hunah pawh a bei thei reng niin a sawi a, ram tam takin an mite chu Ukraine chhuahsan thuai turin an tur hlawm.
London-a Ukraine palai, Vadym Prystaiko chuan an ramin Nato zawm a tum chungchangah an inpawt fan thei tih a sawi a, chu chu Russia hnena an boruak tihdaihna tura a pek theih chu niin BBC a hrilh.
Mahse, Prystaiko hian he thu a sawi hnu lawkah hian an ram danpuiah Nato zawm tura an intiam tawh thu a sawi leh a, anmahniin an pawm phawt chuan ‘Nato pawhin an member atana pawm turin a inpeih tawh’ niin a sawi.
Ukraine hian Organization for Security and Co-operation in Europe (OSCE) kaltlangin Russia hi a sipai inrintir dan chungchang sawihopuiah a sawm a. Russia pawh a telhna, Vienna Document hnuaiah OSCE member ramte hian an sipaite chetvelna hi inhriatsak theihna dan an ziak a ni.
Kuleba chuan, “Russia hian a ti tak tak a nih chuan OSCE hnuaiah langtlang takin, a sipai chet vel dan sawi tura a lo intiam tawhna angin kan boruak tidaia venhimna dinhmun sawiho turin a inlan a ngai a ni,” a ti.
Hetih mek lai hian Ukraine President Volodymyr Zelensky, chuan Russia-in an ram a rûn mai tur anga sawia chiai chu a sawisel a. Russia hian a rûn mai dawn anga a lanna a la hmu ve lo tih a sawi.
Zelenskhy hi Pathianni khan US President Joe Biden nen phone-in an inbia a. White House chuan President Biden hian Ukraine a thlawp thu hrilh nawn lehin innghirnghona titawpa inpalai tawna indawr zel a tul thu an sawi tih a tar lang bawk.
Ukraine-in thuchhuah an siamah pawh an president chuan US-in a thlawp tlat avangin lawm thu a hrilh a. President Zelensky hian US hruaitu hi Ukraine tlawh tur pawhin a sawm a; mahse, he sawmna hi White House lamin engtin nge a chhan tih an tar lang tel lo thung.