Mizoramin Omicron kan kawl ve ta; fimkhur a ngai
Hri leng vangin kan buai a la reh thei lo a, kan inthlahdul chho hret hret ang bawkin mitin kan nun a zalen chho a, kan fimkhur erawh a la ngai reng tih kan hriat thar a va tul em.
Covid-19 chungchanga sorkar thupuangtu, Dr Pachuau Lalmalsawma chuan Mizoramah Covid-19 hri thar, Omicron vei mi 62 an awm tih finfiah a nih thu a sawi a. January thla khan Mizorama Covid-19 kai sample eng emaw zat chu hri thar an kai leh kai loh hriat nan National Insitute of Biomedical Genome (NIBMG), Kolkata-ah en dik tura thawn a ni a, sample an endik tawh result chu thawhtanni khan health department-in a dawng. Covid-19 natna chi thar Omicron, inkai awlsam em em pawh Mizoramin kan kawl ve ta a, kan fimkhur zual a ngai tak zet.
Kan nun zalen dan em em atang phei chuan he Omicron hian kan ram zimte hi min tuamchhuak tawh lovang tih a sawi theih loh a, thinthi leh thlamuanga lo awm ngawt thei hi chu kan la ni lo tih kan hriat thar a tha hle.
Covid-19 variant hrang hrang finfiah theihna, Genome Sequencing Laboratory chu Zoram Medical College-ah bun ni tawh mah se tun thlengin hman theih a la ni lo a, hemi avang hian state pawnah sample-te hi endik a la ngai thin a, a endikna lamin harsatna dang an lo nei veleh thin a nih hlauh phei chuan Omicron laka kan dinhmun hi hriat zung zung a har rih hle ang. Chuvang chuan mitin kan fimkhur a la ngai rih a, covid hri thar dang pawh kan kai leh thuai lovang tih a sawi theih loh bawk nen, mitinin fimkhurna i nunpui thar sauh sauh ang u.