Aizawl Zoological Park-a Bengal Tiger pahnih dah tur zinga pakhat chu tluang taka Mizoram phurh thlen a ni a. Kar hnih vel intensive care-a dah a nih hnuah mipui en theih turin sakei awmna tur (enclosure)-ah dah a ni ang.
Immanuel-a, Range Officer, Aizawl Zoo-in The Zozam Times a hrilh danin sakei pahnih hi Aizawl Zoological Park-a hauhuk nupa tuak khat nen inthlenga Gauhati Zoo atanga lak a ni.
Nikum February thla khan hauhukte hi Gauhati Zoo hnenah hlan an lo ni tawh a; mahse, sakei erawh Aizawl Zoological Park-a a dahna tur (enclosure) siam that ngai a nih avangin sakei hi lak a nih lawk loh hnuah February 14, 2022 khan sakei pakhat chu Mizoram phurh thlen a ni.
Gauhati Zoo atanga sakei la tur hian Dr. John Lalhnuna, Sr. VO, Aizawl Zoo; C. Chawnghmingliana, ACF (WL); Immanuela, Range Officer Aizawl Zoo leh Zoo a thawktu mi panga an kal.
Immanuela chuan, “Sakei hi pahnih tur ni mah se, Gauhati Zoo lamin eng emaw harsatna an neih avangin a nu zawk chauh hi lak phawt a ni a. ‘A tul anga indawrin a pa pawh inpek dan kan la ngaihtuah dawn nia,’ tiin kan inthlah a ni,” a ti.
Sakei an lak tak hi kar hnih vel tal intensive care-a dah hran a nih hnuah harsatna a awm loh chuan a dahna tur hmunah dah chauh tura tih a ni.
Sakei enkawlna senso tur hi state sorkar tum tur a nih thu leh sakei hian ni khatah bawngsa kg 8 vel mamawhin ni tin pe thei tura an inngaih thu te, a kalphung pangngaiah chuan kar khatah ni ruk chhung chaw peka ni khat erawh chaw pek awl tur a nih thu a sawi bawk.
Zawhna chhangin Immanuel-a chuan, “Aizawl Zoo-a kan ramsa enkawlte hi chawm zo lo a, chaw pe tha tawk lo nia an sawi chu thu dik lo a ni. Kan ramsa kawl mekte hi ni khat pawh chaw pek theih loh ni kan nei lo. Chubakah, sahuana ramsa hi thau taka vulh tur a ni lo hrim hrim a. Khung beh an nih avangin ramsa an thau hian natnate an vei hma a. Chaw hi keini duh zat zat pek theih a ni lo a, central zoo approve diet a awm vek a, heihi an hrethiam lo thin zawk a ni,” a ti.
Tun dinhmunah Aizawl Zoo-ah hian ramsa 400 bawr vel enkawl mek a ni a. Sahuan enkawl nana ramsa chaw bikah hian thla khatah Rs 5,20,000 bawr vel sen thin a ni a. Hetih lai hian, mipui tlawh theiha hawn a nih lai khan Aizawl Zoo tlawh tu atangin thla khatah Rs 1,50,000 vel hmuh thin a ni.
“Sahuan hi amah leh amah intungnung tura tih a ni ngai lo. Ramsa lian ngahte chuan sahuan luh man an tito deuh a, keini hian kan titlawm hle. Gauhati-ah pawh luh man Rs 50 te a ni a, keiniah chuan Rs 20 chauh a la ni. Hengte avang hian sahuan luh man pawh ennawn a tul tan tawhin kan hria,” tiin Immanuel-a hian The Zozam Times a hrilh.