State Nodal Officer, IDSP, COVID-19 chungchanga sorkar aiawha thupuangtu ni bawk, Dr Pachuau Lalmalsawma’n hri leng mek chuan Mizoramah a vanglai a tawng chho mek zel nia a lan thu leh la invawrh sang zel thei, hniam lam pan thei a nih thu sawiin, “Kan hun tawn mek hi chutiang chu a ni e, tia sawi fak hleitheih a ni lo,” a ti.
Dr Pachuau Lalmalsawma chuan Mizorama COVID-19 chi thar, Omicron kai finfiah tawh zingah ngaihtuahawm an awm rih lo tih The Zozam Times a hrilh a. Mizorama COVID-19 kai nunna chân zingah Omicron kai an awm leh awm loh sawi mai theih a nih loh thu leh finfiah tawh zingah chuan Omicron kai nunna chân an la awm loh thu a sawi bawk.
Nimin tlai dar 5 thleng khan Mizoramah kumina COVID-19 kai nunna chân 92 an awm tawh a, Mizorama COVID-19 kai nunna chân tawh zawng zawng mi 637 niin heng zinga 409-te chu mipa niin, hmeichhia 228 an ni.
Sorkarin a chhinchhiah danin nimin tlai dar 5 thleng khan Mizoramah COVID-19 kai mi 1,99,019 hmuh chhuah tawh niin, enkawl dam tawh mi 1,88,528 awmin, enkawl mek mi 9,854 an awm bawk a ni.