Indian hla phuah thiam lar Bappi Lahiri chu kum 69 mi niin thawhlehni khan Mumbai-ah a thi. Ramchhunga Disco music leh fashion style mit la tak phochhuahna kawnga sulsutu ber a ni.
Indian music-a revolution pui tak thlentu Lahiri hian nikum April khan hripui lakah hnehna a puang a, tha chho zel tura ngaih anih laiin, thla hmasa khan Damdawi In-a dahluh ngai khawpin a chuap-ah har-satna lian tak a tawk a ni.
Funky music, Chhuat chhir dat dat theih tur music a hmelhriattir khan Indian mipui te lawmah a tla fuh hle. Disco min hmelhriattr a, a music siamah kan lam suau suau a nih kha. Politician te, cricketer te leh Bollywood star te’n an ui thu an sawi hlawm a, a hla lar tak takte sa in, an la thlakhlelh-zia an tarlang.
Engnge a sawi?
Prime Minister Narendra Modi pawhin Lahiri thih thuin a brakhaih hle tih sawiin, “A thihna hian indian music khawvelah hmunruak lian tak hnawh khah rual loh a hnutchhiah ta a, Bappi Lahiri hi a hla danglam bik leh harhvang tak a nihna kan hre kum-khua tawh dawn a ni,” a ti.
‘Bappi Da’ tia hriatlar ni bawk hian India-ah disco ball a vawrh vir a, Mithun-a channa, ‘Disco Dancer’ film leh soundtrack album khan India mai ni lo, khawvel a dengchhuak. Lam dan style thar, zalen tak ni bawk si chu Bollywood-in a hmelhriat nghal a, Mithun-a ngei pawh zankhat thil thu-ah milar tak dinhmunah a hlangkai a, ‘Dancing legend’ tih hial a ni ta. Southern Asia leh Soviet Union-ah phei chuan In tin maiin Mithun-a hming an hre vek, an ti hial!
Bollywood film hit tak tak- Himmawala, Sharaabi, Adventures of Tarzan, Dance Dance, Satyamev Jayate, Shola Aur Shabnam leh a dangte-a hla tam tak kha a phuah a ni.