Mizoramah Omicron vei an awm tih finfiah a nih takah chuan hri kai enkawl dan leh thil dangah a ki dang deuh hleka thiltih a ngai dawn Health Minister Dr R Lalthangliana’n a sawi.
Civil Hospital Aizawl (CHA)-in MJA member-te puala free health check-up an buatsaih kharna chu nimin khan CHA Doctors’ Seminar Room-ah neih a ni a, he hun hmanpuitu health minister chuan, “Omicron vei an awm tih finfiah a nih takah chuan MGDA leh IMA-ten treatment protocol thar an buatsaih a ngai dawn a, a ki dang deuh hlekin thil kan tih chu a ngai dawn a ni,” a ti.
Dr Thangtea chuan India ram leh khawvel hmun danga hri leng dinhmun thlirin kiam lam a pan deuh nia a lan thu sawiin, tun dinhmunah Mizoramah hri kai la pung zelin, nikum lama hri lengin a tihbuai loh vengte luh chilh mah se doctor thiamte erawh chuan kin chin a neih thuai an ring tih a sawi.
Hri leng dona kawngah Mizoramin hma a lak that thu sawiin, “India ramah sample endik kawngah Mizoram chu a ti tha ber pawl kan ni a, endik a tam avangin positivity rate pawh a sang lo thei lo,” a ti.
Health department-a thawktu indaih lohna chungchang sawi bawkin doctor, nurse leh health worker indaih lohna a nasat thu te, thingtlanga thawk tur doctor contract-a lak mai tur an awm lo tiin, tuna thawk mekte chu theihtawp chhuah zel turin a chah.
MJA-te chu Mizoramin Covid-19 a hmachhawn kawnga tanpuitu pawimawh tak an ni tih sawiin, hri dona kawnga an thahnemngaihnaah lawmthu a hrilh a. Aizawl leh Lungleiah MJA member-te tan Free Health Check-up buatsaih a nih bakah district hrang hranga MJA member-te tan an awmna district-a sorkar hospital-ah Free Health Check-up an neih theihna turin ruahmanna siam nise a ti bawk.
Civil Hospital Medical Superintendent Dr. Lalhmuchhuaka kaihhruai inkhawmah hian MJA President Zonunsanga Khiangte pawhin thu asawi a, Civil Hospital, Aizawlin MJA member-te tana Free Health Check-up an neihsak thin chu lawmawm a tih thu a sawi.