Hmasawnna hnathawh pamtul mai lovin
Mizo thalaite pawhin infiamna hrang hrang kan uar chho ve zel a, hmasawn zawngin kan kal nasa ve tawh hlawm hle. Hmun hma erawh duh angin kan nei tha tawk lo hle a, heti lam kawngah erawh hi chuan tam takah hmasawn erawh kan la ngai hle thung.
Hetiang hi kan dinhmun a nih mek lai leh hmun hma neih kawnga kan chaurau em em laiin Lengpui bulah Motor sports Racing Tract & Sports Complex siam turin nilaini khan Mizoram State Sports Council (MSSC) leh Rural Electrification Corporation (REC) ten inremna an ziak a, hlawhtlinpui ngei ni se la, motorsports lama tuite tan chuan mel lung pawimawh tak a ni ngei dawn bawk e.
India hmarchhak leh India khawchhak lama a hmasa ber tur he racing tract hi Rs Nuai 1,000 senga siam tura ruahman a ni a. REC hian an Corporate Social Responsibility (CSR) fund atangin Rs Nuai 750 an sanction a, a bak Rs Nuai 250 lakh chu Mizoram sorkarin a tum ve tura tih a ni bawk.
Sorkar hian thalaite hmakhua ngaiin kawng tam takin hma a la chho a, mahni tuina zawnga dingchhuak thei tura kan lo inbuatsaih thiam ve pawh a tha hle mai. Chutihrual erawh chuan, heng hmasawnna hrang hrang awm turte hi pamtul a nih mai loh nan theihtawpa hmalak ni se la, eng party pawh lo sorkar se, a hlawhtlin theihna tura hma lak chhunzawm ni se la, hun tiam chhunga siam zawh a nih ngei theih nan theihtawpa hnathawh chhoh ni ngei bawk se. Chu chu sorkar thazia pawh niin a hriat bawk.