Omicron avanga India rama chawlhkar eng emaw zat chhung coronavirus kai an pun hluai hnuah tun hnaiah ni khata hri kai hmuh chhuah an tlem ta hle zel a. February 12 hnu lamah mi 50,000 chung lam kai hmuh chhuah an awm lo tawh a, a kai hmuh tamna state-ah pawh dinhmun a ziaawm tawh hle.
Darkar 24 liam ta chhung khan hri kai mi 30,757 hmuh leh a ni a. January thla vela an tam em em hnuah a hniam zel.
Kerala (12,223), Maharashtra (2,748), Karnataka (1,894), Rajasthan (1,702) leh Madhya Pradesh (1,388) chu darkar 24 liam ta chhunga hri kai hmuh an tam zualna panga an ni.
Chawlhkar khat liam ta chhunga ni khata hri kai hmuh zat chawhrualin Kerala chu hmuh tamna ber a ni a. Maharashtra, Karnataka, Tamil Nadu, Madhya Pradesh leh Rajasthan ten an dawt.
Thla hmasaah khan state tam tak chuan inkai awlsam tak, Omicron variant avanga hri a darh chak em avangin inkhuahkhirhna hrang hrang an kalpui.
Nilaini khan sorkar laipui chuan inkhuahkhirhna kalpuite pawh ennawn turin state-te chu a hriattir a. “Tunah hian hri kai hmuh chhuah zat hi ram pumah a hniam lam zawng a ni leh tawh a, states/UT-ten hri avanga inkhuahkhirhna an kalpuite ennawn hun a ni a, hri kai hmuh zat te, enkawl mek zat leh endik atanga a kai hmuh zat azirin inennawn tur a ni,” tiin Union Health Secretary Rajesh Bhushan chuan state leh union territory tinte chu lehkha a thawn.
Haryana-in inkhuahkhirhna a kalpui zawng zawngte a hlih hnuah chiah darkar 24 chhungin Delhi thenawm state–ah hian hri kai mi 703 hmun an ni a. Chawlhkar khat liam ta chhungin ni khata hmuh hi mi 1,000 an tling deuh ziah a ni.
Delhi-ah pawh hri kai hmuh an tlem zel a. January 14-a mi 28,000-in an kai tih hmuh a nih hnuah February 12 atang kha chuan mi 1,000 an tling tawh lo va. Hri leng thawh thumna chuan ram a chhuahsan mek nia ngaih theih a ni.
India ram pumah hian hri kai enkawl lai hi mi nuai 3.32 chuang an la awm a. Chawlhkar khat liam ta chhunga sample endik atanga a kai hmuh hi 3.04% a ni tih health bulletin-ah tar lan a ni.
Darkar 24 liam ta chhung khan Andaman & Nicobar (7), Dadra & Nagar Haveli leh Daman and Diu (2), Lakshadweep (14) leh Nagaland (15) te chu hri kai hmuh an tlem berna an ni.