Mizoram sorkar hnathawk inzawmkhawm pâwl, Federation of Mizoram Government Employees & Workers (FMGEW)-in an thil phûtte sorkarin a tihhlawhtlinsak chhoh zel avangin February 21-25 chhûnga badge dum bel an tum chu an thulh rih.
FMGEW hian a hun taka sorkar hnathawkte hlawh pe turte, Dearness Allowance (DA) tihpunsak tur leh pensioner-te an hamthatna hmuh tur angte pe chhuak vat turte in sorkar an lo ngen tawh a ni.
An thil phutte tihhlawhlin mai a nih loh avanga lungawi lohna lantir nan badge dum bel tumin an intintuah mek laiin nimin khan FMGEW hruaitute leh Chief Minister Zoramthanga an inkawm a. Zoramthanga hian an thil phutte tihhlawhtlin chhoh mek a nih thu hrilhin, badge dum bel an tum chu thulh turin a ngen.
FMGEW hotute hnen atanga thudawn danin DA tipung tura sorkar an ngen angin March 1, 2022 atangin sorkar hnathawkte DA leh pensioner-te DR chu zaa 17 atangin zaa 28-ah tihsan a ni dawn a. Financial year tharah a rang thei angin zaa 31-ah tihsan leh a tum dawn a ni.
Sorkar hnathawkte hlawh chu a hun takah pek tum zel a ni a, pensioner-te retirement benefits chu sorkarin a theih angin a ching fel zel ang a, pensioner-te hamthatna hmuh turte pawh ngaihpawimawh zel a ni ang.
Chief minister hnen atanga an thu hmuhte ngaihtuahin FMGEW executive committee chu nimin chawhnu khan an thukhawm a, sorkarin an ngennate a ngaih pawimawhsak avang leh tihhlawhtlin chhoh zel a tum avangin February 21-25 badge dum bel tura an lo rel tawh chu thulh rih an rel a ni.