Aizawl: Mizoram Pradesh Congress Committee (MPCC) president Lalsawta chuan, mipui tan Mizoramin sorkar tha a mamawh thu leh tun sorkar MNF kaihhruai chu nu leh pa changtlak a nih loh thu a sawi.
Kolasib MJA Press club-ah nimin khan MPCC President Lalsawta hian thu thar thehdarhtute kawmin, “Kan ramah hian mipui an tha a, he rama sorkar tha siam loh chhan tur chhuanlam kan nei reng reng lo. Vawiina kan awm ang lo deuh a awma hmasawn a, hnam chapo ve thei deuh nih kan chak,” a ti a. Chhiatna nasa pawh thlen ngai lohna Mizoram chu khawvel ram dangin an it leh an awh theihna tur tam tak a awm tih a sawi.
MPCC President chuan mipui tan sorkar belh tlak neih a tul thu sawiin, “Tun sorkar MNF kaihhruai chu nu leh pa chang tlak an ni lo. Sorkar thaah chuan thil tha tih a awlsam a, sorkar thaah thilsual tih a harsa em em thung. Tuna kan awm danah chuan thil sual tih a awlsam a, a tisual tute rengin tisual angah an in ngai loa, mipui mitmei venna nei miah loin an rawn inlar chhuak ngam tlat tawh. A ruka kuhva tawlhruk chungchangah pawh dan loa thil titute ualau takin an inlar a, tan tute hi an zawng emaw tih mai tur a ni,” a ti.
That loh theih lohna bawm an tlangaupui chungchang sawiin Lalsawta hian, “Rorelna a that chuan chu chu thatloh theihlohna bawm a. Mi tha bawm kan siam dawn loa, mahse; that loh theih lohna bawm erawh chu a kalphung avang zawkin kan siam thei ang,” a ti a. Party hruaitute, MLA leh minister zawng zawngte pawh that loh theih lohna bawmah khung vek an nih tur thu a sawi bawk.
Sorkar tha chu Mizo mipuiten an tlin thu sawiin, “A phut pawh kan phut a ni,” Lalsawta hian a ti a. “Sorkar tha hi kan tu leh fate tan hlan chhawn kan duh a, kan luah mek hi kan pi leh pute atanga kan neih ang ai mahin kan tu leh fate ta kan hawhah ngai ila, chuti chuan a hman dan kan fimkhur phah lehzual ang tih ka ring,” a ti.
MPCC president hian ram enkawltu tur, a fatu turte chu qualification pathum duham loh te, rinawm te leh taimak te a nih thu sawiin, duham lo nih te, rinawm nihte chu thil awl tak a nih thu a sawi.
Hruaitute chu tha thin mah se party worker te avangin an duh loh zawng an ti fo thin nia sawi chungchang zawhna chu, “Party worker te duhsak ngai khawp sorkar siam kan tum lo,” tiin Lalsawta hian a chhang.
Lalsawta hian Congress party mi ni thin, party danga awm mek te leh party ngaihsak lo mipuite chu ram siamtha tura thawhpuiah sawmin, kum 2023 inthlanah sorkar leh ngei tura tan lakpuiah a sawm nghal bawk.
MPCC vice president Lal Thanzara pawhin, Covid-19 leng karah Mizoram sorkarin health department a kalpui dan chu a lungchhiatthlak thu a sawi a. Hri dona kawnga a thawktu, NHM hnuaia thawktute hun rei tak chhung hlawh an pe thei lo te, district tinah kum khat vel zet school health programme kalpui a ni tawh lo te chu sorkarin mipuite hriselna a ngaih pawimawh tawk lohzia a lang niin a sawi.
He hunah hian MPCC president hi party Treasurer leh CLP leader Zodintluanga Ralte bakah MLA pathum – Ngunlianchunga, Lalrindika Ralte leh Nihar Kanti Chakma ten an tawiawm a ni. Thu thar thehdarhtute an kawm zawh hian Kolasib Diakkawn-ah vantlang inkhawm buatsaihin party hruaitute hian thu an sawi a ni.