Mizoram sorkarin Myanmar atanga dan lova kuhva tawlh ruk dan nan leh a tiluite lo manna tura Sairang thlen hmaa police check gate a siamah kuhva man a la awm lo.
He check gate-a duty-te chuan gate hawn a nih tan, Thawhlehni zan atangin Aizawl lam atanga motor lian tlan thla zawng zawng an check thu The Zozam Times an hrilh a. Tun thlengin kuhva man an la neih loh thu an sawi.
Kuhva rah tawlh danna tur check gate-ah hian Sairang Police Station mi leh sate an duty a, police-te hi chhun zan zawmin an duty a ni.
Tar lan tawh thin angin Central YMA chuan dan lova kuhva tawlh dan nan check gate rintlak tak siam turin sorkar an ngen a, hemi bawhzui hian sorkarin Sairang leh Sailiamkawn, Serchhipah check gate a siam thar a ni.