Mizoram sorkara a nghet loa thawk, Provisional Employee’s Association of Mizoram (PEAM)-in an thil phutte sorkarin tihhlawhtlinsak ngei dawna an hriat avangin lungawi lohna lantira chawlh an lak chu an titawp lailawk.
PEAM hruaitute chuan sorkara an karna chungchangah hian nimin khan Chief Minister Zoramthanga an dawr tih leh chief minister hian an thil phutte tihhlawhtlin dan zawnpui turin Finance Commissioner Vanlalchhuanga thu a pe tih The Zozam Times an hrilh.
PEAM chuan finance department-in an thil phutte an tihhlawhtlinsak ngei an beisei tih sawiin, casual leave an lak chu an tihtawp lailawk rih tih an sawi.
Casual leave an lak chu titawp rih mah se an thil nawrte hi hlawhtling tur zawnga hmalakna a awm loh chuan tun aia nasa zawkin hma an la leh dawn tih an sawi bawk.
Tar lan tawh angin PEAM hian sorkara a ngheta an luh ve theihna tur sum renchemna, austerity measure hmanga sorkarin May 25, 2020 atanga a tih tawp sut tur leh new pension scheme-a inziah luh ve te phutin sorkar an nawr a ni.