Mizoram sorkara contract hna hmu thei tak, dan dik loa tribal certificate neitu, Kamrul Laskar Uddin zawn beihpui chu MSU-in Inrinni atang khan an thlak tan a, hmuh a nih hma ni sarih chhung an zawng dawn.
Kamlova Chhangte tia Schedule Tribe Certificate pek, Kamrul Laskar Uddin hi MSU chuan a tribal certficate chu sorkara pe let turin an lo ngen tawh a, an ngenna hi a tihhlawhtlin tak loh avangin MSU Executive Committee-in a rel angin Inrinni atang khan a zawn hna hi an thawk ta a ni.
MSU hruaitute hi Kamrul-a chenna in, Thuampui Vengah an kalin, inah hian tumah awm lovin a lo inkalh vek a. Kamrul-a zawng tura kal MSU-te hi Branch YMA-ten lo dawng sawngin a chenna hmunte lo kawhhmuhin an kalpui bawk.
Kamrul-a zawn hnatlang kaihruaitu, MSU General Secretary Samuel Zoramthanpuia chuan Mizo hnam himna atana an inhung bikna zah lo taka vaw thiattu, Kamrul Laskar Uddin chu Mizoram pumah zawn chhunzawm zel a ni dawn tih a sawi a, hmuh a nih hma zawng Mizo dan angin ni sarih chhung an zawng dawn tih leh Kamrul-a awmna chin hria chuan MSU hruaitute hriattir turin Mizoram mipui an ngen tih a sawi.
MSU hruaitute lo dawngsawngtu, Thuampui YMA hruaitute chuan Zoram mipui tibuaitu chu an khawtlanga awmtir an phal loh thu an sawi a, kum 2012 emaw, 2013 emaw vel atangin an vengah an awm tan nia hriat thu leh an awm tam loh thu an sawi a, a chungchang chu an zirchian mek thu an sawi.
Kamrul-a chungchangah hian Central YMA hruaitute pawh an biakpawp tawh thu leh a chungchanga document an neih ang angte chu CYMA hruaitute an thawn tawh thu Thuampui YMA hruaitute chuan an sawi bawk a ni.