Kan inhungbingna thil hrang hrangah fimkhur zual a tul
Kan inhungbingna hi ngaih pawimawh a, dah hlut a tha hle. India ram state dangte ang lo takin inhungbingna hrang hrang kan nei a, ILP bika kan inhungbingnate hi uluk leh fimkhur taka kan pekchhuah a tul hle. Buai lohna turah hian kan buai fo a, tunah pawh dan dik lova document pekchhuah a nih thin avangin a rampum buaiin kan buai mek chu a nih hi.
Hetih lai hian sumdawng pawl MIMA pawhin ILP sponsor-tu Mizo hming chhui hleihtheih loh leh contact number thi tawh/number dik lo dah an awm fo niin an sawi a. Address chhui zui tlak loh awm thinte chu home deptt. lam pawhin lo hnawl thin tur leh ILP pe chhuak lo tura an duh thu an sawi.
Kum hnih dam ILP pawh dan ang tak chuan neih hleihtheih loh a nih laiin, nei an awm nual tawh niin MIMA chuan an sawi a. ILP pek tawha felhlel awmte chhui chianga enzuia cancel-sak turin a mawhphurtute an ngen a. “ILP hi Mizo hnam leh ram kan himna a ni tih hriain Mizo tawh phawt chuan kan mawhphurhna a ni tih hriain i vawnghim tlat ang u,” an ti bawk.
ILP kher lo document hrang hrang pekchhuahah pawh hian fimkhur a ngai hle. A pechhuaktute hi kawh rawn an ni lo thei lo a, chuvang chuan heti lam kawnga thawktu hrang hrangte hi kan ram leh hnam tana thawk an ni tih hria a, an fimkhur zual bik pawh a ngai awm e. Chuti a nih loh chuan inchimrilna kan sawi fo thin hi kan kawtkaia awm ve thei reng a ni tih i hria ang u. Thangtharte dem rawn kan nih loh nan vawiina fimkhur hi kan tih tur hmasa chu a ni e.