Lakhimpur Kheri, Uttar Pradesh-a buaina chhuaka a mawhphurtu bera puh, Ashish Mishra-a bail-a chhuah a nih hnu lawka buaina chhuaka thi chhungte chuan Union Minister Ajay Mishra Teni fapa chhuah lailawk hi court-ah an khing let niin news agency ANI chuan a tar lang.
Allahabad High Court-in October 3, 2021-a lo neitute kawng zawh lai hnung lam atanga lirtheia su luihna, mi pariat lai an thihna thlenga a titu bera puh, Mishra-a bail-a a chhuah hi thi chhungte chuan chhuah a nih loh theih nan an khing let.
Online portal Bar & Bench-in a tar lan dan chuan khin letna hi Advocate Prashant Bhushan-a kaltlanga thlen a ni a, thi chhungte hian Uttar Pradesh sorkarin bail-a chhuah lo tura a dilna a hlawhchham avangin a hranpain court-ah an thlen leh a ni.
Ni thum liam taah khan dan hre mi pahnih, CS Panda leh Shiv Kumar Tripathi te pawhin high court-in Mishra-a chhuah lailawk a ni hi Supreme Court-a khin letna an lo thehlut tawh bawk.
Mishra-a bail-a chhuah hi Uttar Pradesh-a assembly inthlan a kal mek lai leh campaign ngawrh vanglai a tih a ni a, eptute chuan nasa takin an sawisel a. Rorel lai, BJP-in Hindu hnam tha, Brahmin-te vote an hmuh theih nana an tih niin an puh a ni.
Suheldev Bharatiya Samaj Party chief OP Rajbhar chuan BJP hian Mishra chungchang hi hlawkpui theih dan dapin an ngaihven hle niin a sawi a. Minister fapa bail-a chhuahtir a nih hian BJP hian Brahmin mite hnenah an tih avanga chhuak a ni tih tihlana an vote hui an tumna niin an sawi.
Samajwadi Party chief Akhilesh Yadav pawhin na takin BJP beih nan a hman phah a, sorkar chu Lakhimpur Kheri-a buaina chhuaka a titu hrem thei lovah a puh.
“Sorkar hian na takin a hrem tur a ni a; mahse, a thei lo. Khawvelin Lakhimpur Kheri-a thil thleng kha an hria a, mi tinin lo neitute thih chhan kha BJP vangah an puh vek a ni,” tiin Yadav hian Bijnor-a thu a sawinaah a sawi a ni.
Lakhimpur Kheri violence tia an sawi mai hi lo neituten BJP kaihhruai sorkar laipuiin lo neihna dan thar pathum a siam duh lohna kawng an zawh lai an hnung lam atanga lirtheia a tawngpawng sut/chilna kha a ni a. Kawng hi Uttar Pradesh Deputy Chief Minister Keshav Prasad Maurya-a’n Banbirpur khua a tlawh dawn avanga dan thar an duh lohzia tihlan khum tuma lo huaihawt an ni.
October 3, 2021-a Banbirpur khua, Tikunia bul, Lakhimpur Kheri district, Uttar Pradesh-a thleng niin mi pariat an thi a, mi dang 10-in hliam an tuar bawk.
Lo neitu pali leh chanchinbumi pakhat chu SUV hmanga sut hlum an ni a. BJP member pahnih leh Ajay Mishra Teni-a lirthei khalhtu chu mipui thinrimin an chil hlum zui.
Mipuite hian Thar leh Fortuner car an hal a, a chuang mi pathum an sawisa hlum a, Scorpio car erawh a khalhtuin a tlanchhiatpui hman a ni.
Car pahnihte hi Union Minister Teni ta nia sawi a ni a, a hmutute chuan minister fapa, a hnua man zui tak, Mishra pawh car pakhatah hian a chuang niin an sawi.