Mizoram ah Electric scooter hmasa ber tlangzarh dawn e

Auto Corner
by Ruata

Mizoram ah Electric scooter
hmasa ber tlangzarh dawn e

Aizawl Chaltlang Ruam Venga electric scooter company Elexa dealer Beez te chuan a hmasa ber atan Mizoramah electric scooter pahnih tlangzarh turin an inbuatsaih mek a, Nilainiah an tlangzarh hman an beisei a. Elexa electric scooter hi pahnih – Eeva leh Evega a awm dawn a ni.

Elexa?
Elexa company dealer Beez te chuan Mizoram electric scooter dealer hmasa ber an nih thu an sawi a. An lirthei company Elexa chu kum 3 liamtaa din a ni a, lirthei siamchhuak tura buaipui neuh neuh tur an tihfel hnua lirthei an siamchhuah tan chu nikum kumtir kha a nih thu an sawi bawk. Elexa company hi Gujarat a inkulh an ni a, an lirthei siamna atan hian ramchhunga hmanrua an hmang vek a, hei vang hian company lamah leh thildang dangah an lirthei leitute tan harsatna a awm an rin loh thu dealer chuan an sawi a ni. India ram hmun hrang hrangah hralhchhuah a ni tawh a. Northeast-ah chuan Manipur leh Mizoramah dealer an nei thung.

An scooter te leh kentel tur
Elexa hian scooter chi hnih Eeva leh Evega an rawn tichhuak dawn a. Eeva hi a len zawng hi 1800x750x1250mm a ni a. Evega hi 1800x700x1225mm a ni thung a. Evega hi a design lamah an rawn siam ‘lerh’ hret a, a sang zawng hret dawn bawk a ni. A bakah chuan a inang tlangpui a. Kg 75 a rit a ni a. Digital Speedometer a nei a, hei bakah hian suspension lamah chuan hydraulic absorber a hmang dawn a ni. Braking lamah chuan a hmalamah disc brake a nei ang a, a hnung lamah drum brake a nei dawn a. A ke hi 90/90-10 a hmang ang a, 12 inch alloy wheel a hmang bawk ang. A wheel base hi Eeva-ah 1270mm a ni a, Evega-ah 1295mm a ni thung dawn a ni.
A kentel tur thildangah chuan reverse mode, remote access key, anti-theft alarm, portable charger tihte a ni dawn a. Rawng chi thum White, Slate grey leh Black te a awm dawn a ni.

A khawl leh thildang
Elexa scooter tlangzarh mai tawh tur hi power lamah chuan 250 watt a pechhuak thei dawn a. Hei hi bhp ang zawng chuan 6-7bhp bawr vel tur a ni a, scooter chak tha pangngai tak tur a ni. Company chuan vawikhat charge full in km 60-65 vel a tlan thei niin an tarlang a. Hei hi Mizorama dealer lam chuan phai zawl mila siam a nih thu leh Mizoramah chuan km 40-50 vel a tlan theih thu an sawi a. Battery lamah chuan Lithium 48V 24/30Ah a hmang a. A capacity hi 1.2 kwh niin fast charging hmangin darkar 2-3 vela charge full thei tura duan a ni

a. Mizoram tan bik tlangram a nih avangin a battery volt sang hret leh charger pawh chak hret an rawn tihchhuah thu dealer chuan an sawi a. Tuna company-in an tarlan aia rang hian a charge full theih dawn niin an sawi bawk. Battery hi 3 years warranty a ni dawn a, spare parts hian kum 1 leh a chanve warranty a nei ang.

Driving license leh registration ngai dawn lo!
Supreme court in India transport authority ah chuan lirthei reng reng chumi powerchin chunglam a nih chuan registration tih a ngai a ti a. Registration ngai tura power a neih ngai zat tling lo hian company lam chuan an rawn siam chak lo lui a. Hei vang hian registration a ngai lo a, lei rual rualin kawngpuiah a khalh tawp theih dawn a ni. Hei bakah hian driving license pawh neih a ngai dawn lo a, chutihrualin naupang kum tling loin an khalh theih tihna ni lo a, puitling lirthei khalh thei si, license nei mai lo pawhin khalh se India ram sorkarin heng electric scooter power hniam hret ho tana dan a siam a nih avangin sawibuai theih a ni dawn lo a ni. Dealer lam chuan he dan hi Mizoram traffic pawhin an hre turah kan ngai an ti a, “Nikum atangin sample kan kawl a, tum hnih chu min tiding tawh a, kan hrilhfiah chuan an hrethiam lutuk a ni,” an ti.
Dealer lam chuan a lirthei chak zawng hi 250 watt a ni a, bhp a leh chuan power sang lutuk lo, 6-7bhp vel a ni, an ti a. “Ruah surah te kan khalh a, tui tling te pawh kan rah pui bawrh bawrh a, a battery a huh lemloh chuan a electric khawlah chuan harsatna kan nei lemlo” an ti a.
Tlangramah chuan registration ngai loa an rawn siam chak loh luih hret avangin a chak lo ve hret a. “Kawng chho ulh deuhah chuan mahnia khalh chuan min zo vek a, kawng pangngaiah chuan tlan chak vuk vuk lo mahse a tlan chak thei pangngai a, 20-40 kmph vel chuan a tlan char char thei,” tiin dealer chuan an sawi.

Tlan chak ai mahin economy a pawimawh
Elexa dealer Beez te chuan an scooter chu an siamchhan takah a chak zawng lam a ni ber lo a. Economy lam company in an ngaihtuah an ti a. Darkar hnih thum charge a Petrol ngai loa khawpui chhunga veivah theihna kha a thatna leh senso tlemna a ni, an ti a. He scooter hi petrol mana inseng miah lo a veivah zung zung nan a tangkai dawn hle a ni.
He scooter thar tur dealer Beez chuan June emaw July thlaah a chak tha deuh ‘high power version’ a rawn thlen an beisei thu an sawi a. Tunah hian testing an kalpui a, hei erawh chu registration tih ngai tur chak tha tak a ni tawh dawn thung a ni, an ti.

A man leh booking chungchang?
Elexa electric scooter thar tur pahnih hi dealer lam chuan 40 an kawl mek tih an sawi a. Booking hi tih lawk theihin an siam lo tih an sawi a. An tlangzarh niah a lei hmasa sa chan hmasak angin an kalpui dawn tih an sawi. A man tur hi an la sawi chiang lo a, Rs. 85,000 atanga 90,000 man inkarah khung vek an tum.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427