India chuan Thawhlehni khan Pakistan ram kaltlang turin Afghanistan-ah wheat tonne 2,500 a thawn a. Indonain rei tak a tihbuai tawh puih nan hian tonne 50,000 thawn a tum a ni.
News agency ANI-in thlalak a pho chhuahah Foreign Secretary Harsh Shringla chuan Punjab-a Attari-Wagah ramri-ah thawn chhuah turte hi a vau liam a ni.
Nikum October khan sorkar laipui chuan Pakistan hnenah Afghanistan-a chengte tana wheat a thawnna tur kalkawng hman phalsak tura rawtna a neih thlenin Islamabad pawhin November 24 khan phalna a pek thu a hrilh a ni.
Pakistan-in phalna a pek ang chuan Afghanistan-a truck-te chuan India panin Attari-Wagah ramri-ah an phur an hlang a. Afghanistan-a Jalalabad lam panin, Pakistan nena an inrina, Torkham ramri atangin an ram an lut leh dawn a ni.
India-a Afghanistan ram palai, Farid Mamundzay chuan Twitter-ah, “India-in Afghanistan a puihna tura wheat a thawn chhuah vai liamna hun ka hmanpui thei hi chawimawina sang tak a ni a. Hun khirh tak tawh laia metric tonne 50,000 zet an thawh tur hi ei tur lama ram dangin an thawh zawng zawngah a tam ber a ni dawn,” tiin a tar lang.
Afghanistan thenawm ram, Pakistan pawhin tun hnaiah a thenawma mite hnenah hian ei tur leh damdawi eng emaw zat a lo thawn ve tawh bawk.
India hian Afghanistan ram hi a pui nasa hle a. Ni hnih liam taah mai khan sorkar laipui chuan damdawi leh thawmhnaw tonne 2.5 zeta tam chu damdawi lama puihna a thawn vawi nga nan a thawn chhuak leh tawh.
Nikum August thlaa tharum nena Taliban-in mipui sorkar paiha thuneihna an chan leh hnuah Afghanistan-a nunaute hi a pui nasa a. Afghanistan ram economy hi tluchhe mai thei dinhmunah a ding mek a ni.
External affairs ministry thupuangtu, Arindam Bagchi chuan January khan, “Sorkar chuan Afghan mite pui turin a intiam a, an mamawh ei leh in tur, Covid vaccine leh nun chhan nana pawimawh damdawite a pe dawn a ni,” tiin a lo sawi tawh a ni.
&&&&&