Alpine Formula 1 team chuan tun season a an car hman tur Alpine A522 an phochhuak.
French team hi team hrang hrang 10 zinga car phochhuak pakuana an ni a. An chief executive Laurent Rossi chuan an car thar chu Formula 1 champion nih an tumna kawnga ke an penna lian tak a nih thu a sawi.
Rossi chuan season liamta a intlansiak pakhat a pakhatna dinhmun an hauh avangin kawng dik an zawh mek tih a sawi a. “A chung ber kan panna kawnga kawng dik kan zawh a, chhunzawm zel kan duh. Kum 2022-ah hmasawnna kim tak neih kan duh a, kan hmalam hunah championship title a awm ngeina turin kawng engkimah hmasawn kan duh.” a ti.
Alpine hi tunhnai kum thum chhungin constructors inelnaah pangana an ni ziah a. Kar hmasa khan Aston Martin team boss \hin Otmar Szafnauer chu team principal thar atan an lakluh thu an puang.
Kum 2022-ah driver ngai an la ring dawn a, vawi hnih world champion ni tawh Spanish veteran Fernando Alonso leh French driver beiseiawm Esteban Ocon ten an car an khalh ang.
Nikum season khan Hungary a intlansiakah Ocon hian pakhatna a hauh a. Kum 2013 Australian Grand Prix a Lotus an nihlaia hnehna an chan hnuah pakhatna an hauh leh hmasak ber a ni.
Ocon chuan season thar hmachhawn tura a inpeih thu sawiin, “Tisa leh rilruah ka inpeih tawh a, he car hi eng anga \ha chiah nge a nih hriat nan tlankawng a luh ka chak tawh hle.” a ti.
Tun season-ah Alpine hian car rawng chi hnih an hmang dawn a. Kum 2017 a\anga 2020 chhunga Force India/Racing Point sponsor-tu BWT in an sponsor avangin intlansiak hmasa pahnihah an car rawngah a sendang a langsar ber dawn.
A bakah erawh an car rawng pangngai an hmang dawn a, a pawl a langsar ber thung ang.