Mizoram Larsap Dr Hari Babu Kambhampati chuan sorkar flagship programme, Socio Economic Development Policy (SEDP) sum hmangin Mizoram leh Assam inrina velah police duty-na tur siam a nih tawh thu sawiin, SEDP sum hmangin Vairengte-ah company headquarters leh in hrang hrang sak tum leh a nih thu a sawi.
Mizoram Legislative Assembly pariatna, session pakuana, nimina neihah thu sawiin larsap chuan SEDP sum Rs nuai 82.99 hmangin Mizoram leh Assam inrina velah in leh barrack hrang hrang sak a nih thu a sawi a, “Heng inte hi hi sak zawh fel a ni tawh,” a ti.
Larsap chuan ramria SEDP sum hmanga hmalakna tur dangte sawi tel bawkin, Rs vaibelchhe 2.23 sengin Vairengte-ah company headquarters siam tum a nih thu leh SEDP hnuaiah bawk hian Assam nena inrina velah Rs. vaibelchhe 2.19 sengin in hrang hrang sak tum a nih thu a sawi.
Company headquarters siam tum leh in hrang hrang sak tum hi pawm fel a ni tawh tiin, “Hna pawh tan thuai a ni ang,” a ti.
Larsap chuan sorkar flagship programme, SEDP hnuaia hnathawh dangte pawh sawiin, kum kal lai 2021-22-ah hian department hrang hrang hnenah hmasawnna hnathawh nan Rs. vaibelchhe 83.39 pek a nih tawh thu leh Entrepreneurship Development Scheme hnuaiah kum tinin a ti mite puih an nih thu a sawi.
Bukpui leh Khawzawl inkarah 6.3MVA,132/33 kV Sub-Station chu SEDP hnuaiah Rs nuai 795.76 sengin siam a nih tawh thu sawi bawkin, SEDP hnuaiah hian zirtirtu indaih lohna sutkian nan high school zirtirtu 157 lak an nih tawh thu a sawi.
Larsap hian union budget-a Aizawl by Pass Road siamna tur Rs vaibelchhe 500 leh Bamboo Link Road Pilot Project atana Rs. vaibelchhe 100 dah a nih chungchangte a sawi bawk.
Mizoram a ralmuan theih nana thawktu force mite chungah lawmthu a sawi a, tlawmngai pawl te, kohhran te, media leh mipuite’n an thawhpui tha tih sawiin, lawmthu a sawi bawk a ni.