Hmasawnna hnathawh daltu chu zawnchhuah zel mai nise
Khawzawl – Ngaizawl PMGSY road black topping/white topping hna, kum 2017 atanga tan tawh chu tun thlenga zawh a la nih loh avang leh hna a chak zawkna tur daltu an awm nia hriain mipuiin tun hnai khan hnathawktute camp chu an tichhia a, he hna enkawltu thlak an duh thu an sawi bawk.
Ngaizawl VC leh All NGO Coordination Committee-in hemi chungchangah hian thuchhuah siamin, he kawng siam hna hi first class contractor Collin Lalsangpuii hminga Lalrinliana Sailo-in a chhan a nih thu leh Romuanpuii Zadeng in a thawh thu an tarlang a, hnathawktu ber nen hian an inhmu thiam lo chho ta a ni.
Kan rama hmasawnna hnathawh hrang hrangah hian thiltithei deuh leh politician lawk tak takte an inrawlh thuk hle mai thin a, hei hian hna a tichak lo a, officer lamin an hlau lo thei lo bawk si. Chuvang chuan hnathawh tam zawk hi chu a chak thei lo thin reng bawk a ni. Hei hi hman atanga kan ram mutan a la ni reng a, mipui kan tanrual hi a hun ve tawh thin reng a ni.
Hmun hrang hrangah hetiang hi a thleng chho zel lovang tih a sawi theih loh a, a thlen loh hram zel theih nan hnathawktute pawhin hma thar an lak a, chak zawka hun tiam chhunga an zawh theihna tura an inruahman sauh sauh zel pawh a ngai awm e. Chuti a nih loh chuan buai lohna turah bawk hian buaiin, mipui lungawi lo tawn a hlauhawm tih i hrereng ang u.