Brazilian khawpui pakhat, Petropolis-a ruah nasa tak sur avanga lei min leh tui lian thlenga thi chu mi 186 an tling ta tih thuneituten an sawi a. Chhiat an tawh atang hian chawlhkar khat a liam ta chiah bawk.
Khualzinten an tlawh uar tak khuaah hian chhiat an tawh atangin chhanchhuah hna thawktuten chhiatna kara dam chhuak zawn hna an la thawk zel a. Tlangrama lei nasa tak minin chirh a siam leh in chim chhiate an hai.
Tun thlenga chin hriat lohva la awm hi mi 69 an la ni a, ruang hai chhuah belh zel a nih avangin a tlahniam zel a. Chhungkaw tam tak an tlan darh a, an chhungte chanchin ngaichang leh thi zingah an tel em tih hriat tumin an vir buai nasa hle.
February 15-a ruah tam tak an dawn avanga chhiatna thlengah hian police chuan naupang 33 an thi tel tih an sawi a. An ram chhimchhak lam khua hian darkar reilo te chhungin thla khata an ruahtui dawn ang zat zet an dawng hman a ni.
An chenna in chân leh derthawng mi 850 chuang chu emergency shelter-ah dah khawm an la ni.
Thuneitute chuan chirh then beihpui an thlak a, a hautak tak zet tih an sawi a. In chim senghawi leh lirthei tang ringawt pawh mihring 3,00,000 vel chennaah hian a tam hle tih an sawi.
Petropolis hi kum zabi 19-na hun laia Brazilian lalramin nipui laia an khawpui atana an hman thin a ni.
Thla thum liam ta chhung khan Brazil-ah hian thlipui leh ruahpui avangin mi 236 zet an thi tawh.
Mi thiamte chuan ruah bawhawk sur leh chiam thin hi khawvel puma sik leh sa inthlak nasain a nghawng chhuah pakhat niin an sawi.