Fisheries Minister K Lalrinliana chuan chakai farm an buaipui mek chu Rs. nuai 547 senna tur ni anga mi thenkhatin social media lama an thehdarh chu thudik lo a nih tih sawiin, he thilah hian FIR theh luh an tum thu a sawi.
Nimina assembly session neihah MNF member Zothantluanga zawhna kal zelah MNF member, Lalrinsanga Ralte-in chakai farm dinhmun sawifiah tura a ngen angin minister chuan social media lama David Sailo tih leh mi dangten chakai farm chu Rs. nuai 547 senna tur a nih thu leh chakai pakhat Rs. 9,000 man anga an sawi chu thudik lo a nih thu a sawi.
Minister chuan, “Hemi chungchang hi kan department secretary leh director te nen pawh kan sawiho a, ‘FIR thehlut ila, i man chhuak teh ang u,’ kan ti,” a ti.
K Lalrinliana chuan chhungkaw tinin an ei than chakai chu thianghlim zawka khawia thar dan kawng an zawn thu sawiin, a enchhin nan farm pakhatin DPR an siam a, department-in a zirchian hnuah pawisa an dil tih a sawi.
Chakai farm siam nan SEDP atangin Rs nuai 57 pek an nih thu sawiin, “Finance department-in contractor profit an cut leh hnua hnathawhna atana an sum hmuh tak chu Rs 52,97,000 a ni,” a ti.
Tunah hian chakai khawina tur pathum an siam tawh thu sawiin, sum pawh Rs 36,97,000 an hman tawh thu leh a bak Rs. nuai 20 lai chu hman lohin a la awm a, chakai farm pilot projcet chu la zo fel lo tih a sawi.
Minister chuan, “Kan ram luidunga ei chite tihpuna lui lam sa ei tur kan ngah theihna tura ruahmanna kan kalpui mek laia thawktute leh he thila ngaihtuahna hmangtute tibeidawng zawnga thil a kal thin chu pawi ka ti hle a ni,” a ti.
Chakai farm chungchanga thudik lo thehdarh a nih zan khan an mut hleih theih loh thu a sawi a, “Thudik lo thehdarh a ni tih ka hriat khan ka rilru a na hle a ni,” tiin a sawi.
K. Lalrinliana chuan chakai farm a hlawhtlin ngei theih nana theihtawp an chhuah thu sawiin, chakai chu an khawi pun ngei theih an beisei thu a sawi bawk.