Sorkar hian hmasawnna hnathawh enzui uluk se
Khawzawl – Ngaizawl inkar kawng siam mek a lar hle mai a, harsatna tawh dan zawng zawng hria nia insawite thusawi pawh hriat tur a awm thar zel bawk. Hmalakna engtinnge a awm zel dawn a hriat loh a, sorkar hian uluk leh fir zawka hmasawnna hnathawh hi a kalpui a, a vil uluk a ngai dawn hle tih pawh kan hriat thar a tha viau.
Hetih lai hian kan tlawmngai pawl lian ber Central YMA chuan Adviser to Chief Minister Technical, Er. K.Lalsawmvela chu a pisaah an kawm a, PMGSY hnuaia kawng sial mek zawh hun tawha la zawh fel lohte siam zawh fel vat a nih theih nana hma la turin an ngen bawk a, hmasawnna hnathawh hrang hrangte hian enkawl zuitu an mamawh hle tih kan hriat thar tlan leh pawh a tul awm e.
An inkawmhonaah hian Er K Lalsawmvela hi PWD Chief Engineer Er. Bowman leh Er. David Sapzova, SE ten an tawiawm a. Central YMA hruaitute chuan PMGSY hnuaia kawng sial mek zawh hun tawha zawh fel lohte leh hnathawh tha lote chungchang sawiin, hna zawh huna la zawh lohte zawh fel a nih thuai theih nana hma la turte, hnathawk turin contractor hnathawk thei ngei hmang thin tura hma la turin Er K Lalsawmvela hi an ngen a ni. He an ngenna hian rahtha chhuah se la, a nih dan tur ang taka hnathawh hrang hrangte a kal zel theih nan hmalak nghal ni se, sorkar pawh hian hmasawnna hnathawh hrang hrangte hi ngai pawimawhin, vil zuitu ni zawk mawlh teh se.