- Debbie Rinawmi
Kan ram hi chu a mak ngawt mai! Kan ramah hian thil mak tak tak a va thleng nasa em! Tunlaia thil thleng zawng zawng hi sawi sen pawh a ni lo va, chutih rual chuan ‘bye bye’ hian a khaikhawm tha hle lawi si a, chuvangin ziah makmawh, sawi makmawh te pawh kan ti thei awm e. Kuhva chungchangah sawrkar thuneitu te lakah FIR thehluh a ni a, a thilsual tu zawk te zaka kimkit chu sawi loh, interview hial an pe a, khang thil a thlen khan kan mak tawh thu te, kan hnam ang zawng pawhin mahni zawhna kan inzawt a nih kha. Kha zia kha tun Ramtuk thla ni 24, 2022 hian Assembly Session-ah kan hmu leh ta chiah a ni.
ZE HLUI
Ze hlui tam tak hi a hun lai chuan sawisel a hlawh fo va; a aia tha lo zawk a chhuah hnuah erawh a ngaihawmin hun kal ta min thlir tir vawng vawng a nih hi. Mizo te hi khawtlang mitin min thunun kan ti thin a. Khawtlang mitin kan inteh a, mi tehnaa tlin loh kan hlau fo. Zaithiam leh hla phuah thiam Vanlalsailova’n a hlaah “mualpho hlau mai ringtu” a ti a. A ni tak tak, mualpho kan hlauh avang hian tha awmin kan awm thin a, mualpho kan hlauhna hian thui tak chu a tha lamah min kal tir ve thin, thleng thuk lutuk lo mahse. Ze hluiah chuan ram hruaitu te pawhin mipui tih der nan tal an tha der a, than mawi an tum thin. Khang hunlai te kha a va ngaihawm em! Khang hun – ram hruaitu te thalai te’n kan ngaihsan a, beiseina nena kan thlir lai kha. Khang hunah te chuan beiseinain ram hma bak tur hlim takin min suangtuah tir a. Mipui te’n ngaihtuahnaah in sang kan lo sa a, rawng chi hranga chei mawi suangtuahnaa Mizoram kha thlirin hun kan hmang thin kha a ni a.
ZE THAR
Ze tharah chuan inthup tit tet a awm ve tawh lo, mi tin mai hi kan leng halh a. Ze hlui put hun laia thil sual kan tihah khawtlanga kan inthlahrung dak ang nun duhawm kha kan nei tawh lo. Thil sual tihin zahna min thlen tawh lo va. Ram hruaitu te pawhin eiruk an zak tawh lo va, mualphoah an inngai lo a ni chek ang chu. Kan Kristianna hian sawrkar sawi chhiat te, sawrkar laka hel te min ti tim a. Kan kalphung ngaihtuah hi chuan thalai phun ri hi a tlem teh e, beiseina kan hloh tak vang pawh a ni mahna . Mipui te sawrkarah hian Instagram lama ram hruaitu lu ber account pawh comment theih loha dah a ni te hian pulpit nen inanna riau a nei; pulpit pawh hi hnial theih loha thusawina hmun a ni tlat a ni. He mi atang ringawt pawh hian mipui te rahbeh kan nihzia a lang chiang hle a ni. Kuhva te pawh sawi kai zel ila, thil thleng hnaivai a la ni bawk a. Kuhva chungchang te pawh thil lian tham tak a nih avangin sawrkarin hma la rap rap ngam se tih ngaihtuahna nen kan thlir a. DC meuh lakah a tisual tu dan bawhchhe tu ten FIR an thehlut ngam tlat, dan bawhchhe tu te hian kan sawrkar, kan ram hruaitu te hi an lo hre chiang ber zawk a nih dawn hi. Khang te pawh kan ram pelhah chuan an man hmak mai a, damdawi a lo tel teuh a nih kha.
BYE BYE
Kuhva chungchanga mipui rilruna pawh a la dam hman lo tihah kawng siam chungchangah Assembly Speaker meuh a’n mualpho leh mauh mai a. Inkiltawiha inthlahrung tur a nih tehlul nen Opposition Party (INC & ZPM) te rorelna hmun atangin an chhuak a, chutah Speaker ber chuan nui huah huah chungin a ‘bye bye’ lawp lawp tak kha. E, kan sawi hmaih dawn, Speaker-in rorel tan dawnah Pathian Thu Thianghlim a chhiar tak kha mawle. Ram hruaitu te hi mipui thlan tlin an ni a, mipui aiawh an ni bawk. Opposition party te an chhuak nalh kha a lawmawm hle, anni pawh kha ram mipui te aiawha chhuak an ni. Eiruk sum hi mipui te pek khawm kan pawisa te, hma kan sawn nana central atanga lo kal te an ni a, chuvangin kan chan aia chang te rorelnaa awm kha kan chak lem lo a ni. Assembly Speaker-in a chhuak tur te a ‘bye bye’ kha an ni chauh a ban a vai khum a ni lo va, mipuite ban min vai khum a ni ; chhuak tur te a nuih a a tham lo kha an ni chauh a tham lo a ni lo, ram rorelna hna leh mipui te a tham lohna leh a hmuhsit na a ni. A lo nuihpui tu te pawh kha an bang chuang lo, rilru hmun khat pu an nih avangin.
THUAWIHNA HI
Kan pi leh pu te hi mi zai ngai thin tak an ni a, kan kristianna nen pawh a inhmeh viau. Kan Bible-ah rorel tu te thu thua awm tura mipui te fuihna a awm a, chumi rual chiah chuan rorel tu te mawhphurhna tam tak a inziak tel bawk a ni. Bible-ah hian thuawih nihlawhna kan hmuh rualin rorel tu tha lovin ro a relnaa dan bawhchhiatnain mipui te a chhanhim thu kan hmu tel bawk. Daniela hun lai te pawhin Daniela luhlulna leh ram rorel tu thu a awih loh avanga Pathian hming a ropui dan kan hmu a nih kha.
TLIPNA
Mizo te hi hnam dawhthei tak kan ni; kan tawrh ang tam tak hi hnam dang te chuan sawrkar thil an tih chhiat a an hal chhiat thinna a ni. Mizo thalai te hi chu kan fel asin, tih lungawi lah kan awl. Ram hruaitu te kan ring zo tawh lo te, an thusawi kan nuih mai mai te hi ram hruaitu tan chuan tlawm thlak tawpkhawk a ni. Ram dang, hmun dang pawh thlir ila, mipui dawhtheihnain a dawhtheih loh chinah chuan ‘revolution’ a chhuak thin. He mi thleng lo tur hian mi zawng zawng hi insiamtha tlang ila, inzah tawnin Pathian hi tih tlang ila; kan buaina hi chinfelin a awm ngei ang.