Sorkar kal dan kan thlir zel a ni rih phawt e
Assembly House Leader, chief minister ni bawk Zoramthanga chuan an sorkar apianga harsatna lian tham an tawh thin thu leh tun term-ah bik phei chuan amah pawha chhiatpui tham hrang hrang an tawh nasat thu a sawi chhuak a, ‘damkhawchhuah kan tum ringawt mai a ni,’ a ti hial.
A nih lah tak a, Covid-19 hri lengin khawvel a run a, kan ram ngeiah pawh kan tuar nasa hle. Hriat ngai loh a nih miau avangin, mitin kan buai a, sorkar pawhin a kalphung a thlak fo a tul a, hmasawnna hnathawh a kal hlei thei lo a; vawk vulhtuten ASF an tuar chhunzawm a, khawchhak lamah lirnghing leh Burma raltlan an awm reng bawk nen, a luhaithlak duh ngawtin a rinawm thin. Assam nena buaina phei chuan reh tikni a nei maiin a rinawm loh a, inremna a awm theih nana hmalak zel hi a ni berin a lang a, sorkar hi a khawngaihthlak letling zawk phian a ni.
CM hian hetiang hi dinhmun a nih laiin sorkar flagship SEDP chu kalpui hram an tum tawh thu a sawi a, chhungkaw khatin cheng sing nga tal an dawn theihna tura chhungkaw sing 6 aia tlem lo an thlan hmasak tur thu a sawi a, eng tin tak kalpui chho dawn nimaw? Hri leng leh harsatna hrang hrangin a tlakbuak chunga an hmalak tum chhohna kawngah hian vuivai leh lungni lo an tam chho hlein a rinawm thung a, chung mite tuamdam leh thawidam chunga ke an pen thiam erawh a ngai hle ang. Engpawhnise, sorkar kal dan hi mipui lam chuan kan thlir zel a ni rih phawt e.