India-in mi a man duh ber zinga mi, Dawood Ibrahim-a nena inzawmna nei nia puh a nih avanga Enforcement Directorate (ED)-in an man, Maharashtra Minister Nawab Malik chu Zirtawpni khan Mumbai-a JJ Hospital-ah dah luh a ni.
Zirtawpni chawhma khan ED mite hian Malik-a hi a hriselna dinhmun endik turin damdawi inah an hruai a, dah luh zui a ni.
Malik-a hi ED kutah March 3 thleng awm turin court chuan a ti a, hei hi Dawood Ibrahim nena thil leinaa inzawmna nei nia puh a nih vang a ni a. Mumbai-a court chuan man a nih hnuah ni sarih chhung an kawl a phalsak a ni.
Nilainia an man, National Congress Party hruaitu hi ED chuan ni 14 chhung kawl dil mah se court hian a phalsak lo.
Malik-a hi man a nih hmaa ED-in thu an zawh fiah laiin a chhang tha duh lovin hnuchhuitute hi a thawhpui tha duh lo hle nia sawi a ni a. Man a nih hnuah pawh Malik-a hian an buaina chu bei lehin a hneh ngei tur thu a sawi.
February thla tir khan ED hian Mumbai-a Dawood Ibrahim-a farnu, Haseena Parkar-i chenna in chu sum chhehrelh leh dik lo taka hman chungchangah an dap.
Mumbai-a mi sual rual hotupa nena inkaihhnawih hmun hrang hrang an dap zui bawk.
BJP chuan Minister Malik-a hi bang tura an phut thu an sawi a. Hetih lai hian Maharashtra-a tangrual sorkar, Maha Vikas Agadhi (MVA– Shiv Sena, Congress leh NCP tangho) erawh chuan an thil phut hi an hnawlsak thung.