Mi mal lirthei khalhtute leh enkawltute tana hamthatna tur, private member’s bill, ‘Mizoram Private Transport Workers (Welfare) Bill, 2022,’ tih nimina Mizoram Budget Session neiha Aizawl North-II bialtu MLA Dr Vanlalthlana’n a put luh chu hnawl a ni.
Private member’s bill put luh chhan sawiin Dr Vanlalthlana chuan, “Mizorama lirthei khalhtute leh enkawlte hian tlang chhengchhe tak tak leh kawng nalah, kan dam khaw chhuahna atan damdawi te, silh fen te, ei tur leh thil tam tak min phurhsak thin a. Mipuiten hmun hla tak kan thlen theih phah a, ramri buaiah pawh a hmatawngtute chu driver-te an ni a, mahni nunna atan pawha hlauhawm khawpin an tei a ngai a. Chuvang chuan, anmahni tuamhlawm a, enkawl let hi kan bat niin ka hria,” a ti.
Dr Vanlalthlana hian a bill put luh chungchang sawi fiah danin, mi mal lirthei khalhtute emaw, handyman emaw te chu minimum wage act dan tlawhchhana rawih tur a nih thu te, ni khatah darkar 11 aia rei emaw, kar khatah ni 55 aia rei emaw chhawr theih loh a nih thu te, chhum lo chat loa darkar nga chhawr an nih chuan ni khat chawlh an nei tur tihte leh lirthei neituten dan an awm loh emaw, sum thawh tur ang an thawh duh loh avanga hremna awm thei te a bill put luhah a chuang tih a sawi.
The Mizoram Private Transport Workers (Welfare) Bill, 2022 chungchang hi house member 24-in an sawi a, an zinga mi pakuain thlawin 15-in an thlawp lo.
Aizawl North-II bialtu MLA private member’s bill put luh hi sawi hona neih a nih hnuah buk a ni a, a tam zawkin an thlawp loh avangin Assembly Speaker Lalrinliana Sailo-in hnawl a ni tih a puang.
&&&&&&