Russia chuan Ukraine ram chu a luhchilh thuk tawlh tawlh tawh a, an khawpui ber, Kyiv-ah pawh an tank-te an lut tawh.
Ukrainian Ministry of Defence chuan Kyiv khawpui hmar lam, Russian tank-te an luhnaa chengte chu fire bomb siama ‘hmelma lo that’ turin a ti.
Ningani zan zankhua khan khawpui chhungah hian thil puak thawm hriat tur a awm a, flat lian tak pakhat a chhia tih hriat chian a ni a, civil mi eng emaw zatin hliam an tuar.
Russia chuan tun thlengin engmah an la che lo niin an insawi.
Russian defence ministry-a hotu sang pakhat chuan Kyiv khawpui chunga thlawhna kah thlak chu Ukrainian ta niin a sawi tih Reuters news agency chuan a tar lang a. Ukraine erawh chuan Russian jet ngei niin an sawi thung.
Indo ni hnihna bul tanah khawchhak, hmar leh chhim lam atanga Ukraine nawr mektu, Moscow hian Kyiv chu lak an tum ngei tih a lang chiang hle.
Ukrainian sipaite chuan Russia-in hma an sawn zel tur lo danchah nan lei an bomb chhia.
Khawpui hmar lam, Obolon district-a chengte chu Zirtawpni khan khawpui thuneituten pawn chhuak lo tur leh ‘sipai beihpui thlak’ kalsan hram turin an ngen tih Reuters chuan a tar lang a. Obolon hi Russian tank-ten Kyiv khawpui an lut lai video an lakna hmun a ni.
Ministry of Defence chuan he district-a chengte hnenahah hian an Facebook page hmangin sipai chet dan an hrilh a, Molotov cocktail (firebomb) siama hmelma lo hmachhawn turin an ti.
Ningani zan khan chhungkaw tam tak chu Kyiv-a metro station hrang hrangah riakin vansang atanga kah laka inhumhim nan an hmang a. Mipuite hi an bitna hmun, Pozniake vela chengte pawh an tel a, mi pariat velin hliam an tuar.
Kyiv-a chengte chuan Russia leh President Vladimir Putin-a chu an dem nasa hle a, tawngkam chhe tak takin a chungchang an sawi hlawm.
“Civil mite leh an hmun an tum lo tih an sawi a; mahse, dawt vek a ni,” tiin Zirtawpni hma taka video-a thuchhuah a siamah Ukraine President Volodymyr Zelensky chuan a sawi a. “A tak takah chuan khawi lai hmun nge an kah tihah engmah an thliar lo,” a ti.
Ukraine chuan civil mi leh sipai 137 thah an ni tawh tih a sawi a. UN chuan mi 1,00,000 chuangin an chenna in an chhuahsan tawh tih a sawi bawk.
Ningani zan khan Ukrainian 1,000 chuangin relin Poland chhimchhak lama Przemysl khawpui an thleng.
British Defence Minister Ben Wallace chuan Russia hian Ningani hma taka an thenawm laka beihpui a thlak tan atangin an mi 450 an chân tawh nia an hriat thu a sawi a.
TV-a thu a sawinaa indo thu puangtu, President Putin chuan eng ram pawh, an buaina chungchanga inrawlh chu la hriat ngai loh thil hmanga tih an tum thuin a vau.
Khawthlang ram hnuchhui mite chuan a hma khan Russia hian Kyiv thunun ngei turin nasa takin an inchhek muk nasa hle tih an sawi a, thlawhna atang leh missile hmangin khawpui hrang hrang leh sipai hmunte an kap char char bawk niin an sawi a. Ukraine nena an inrina kil thum atangin an lut tih an sawi.
Ukraine-in a bet zawk angin lang mah se President Zelensky chuan an do let zel dawn tih a sawi a. A hna chu khawthlang ramte zinga an ram awmtir reng a nih thu a sawi bawk.
Ukraine-ah hian ram tana nun hlan huaisen tak tak pawh hmuh tur an awm tawh a. Black Sea thliarkara border guard sipai 13 chu Russian indo lawngten inpe turin ti mah se an inpe duh lo va, bomb hmanga tihhlum zui an ni.
President Zelensky chuan huaisen taka an ram tana nun petute chu pasaltha chawimawi an dawn tih an sawi.
Ningania inbeihnaah hian Chernobyl-a nuclear power plant hlui pawh a tel a. Ukrainian presidential adviser Mykhaylo Podolyak chuan nuclear plant hluiah hian nasa taka inbeihna a thlen hnuah an chân tih a sawi.
Zirtawpni khan Ukraine-a nuclear agency chuan plant-ah hian radiation level a sang nghal hle tih a sawi a. Hetih lai hian Russian defence ministry erawh chuan a danglam lo niin an sawi a, ‘power plant himna tur leh Chernobyl Nuclear Plant hlutna chu an vawnghim dawn’ niin a sawi bawk.