Ukraine laka Russia chet danah khawvel mipui an thinrim hle a, zaithiam lar tak tek te pawh an tel. Madonna, Miley Cyrus bakah Russian zaithiam thenkhat an bang lo. Supermodel Gigi Hadid, Hollywood star Aston Kucher leh Angelina Jolie pawh a tel.
“Awmze nei lova Russia-in Ukraine a run hi a tawp nghal hmak tur a ni. Khawngaih takin, he buaina hnuaia harsatna tawpkhawk tawk mek Ukraine mipuite puihna tur i thawnlut ang u. Putin hian mihringte dikna leh chanvo zawng zawng a palzut fai vek a, Ukraine ram zalenna nuai bo turin Putin hian dikna pakhatmah a nei lo. President Zelensky, kan thlawp tlat che! Nang leh i ram tan kan tawngtai reng e,” tiin Madonna hian a sawi.
Miley Cyrus pawhin Ukraine leh a ram mipuite tan a ding reng tih sawiin, “Ka film, ‘Nothing Breaks Like A Heart’ kha Kyiv (Ukraine khawpui)-a siam a ni a, tualchhung mite’n thinlung taka min lo lawm a, min thlawpna leh min puihna zawng zawngah khan ka lawm em em a ni. Report hrang hrangah Ukraine 40 chuang an thi tawh tihte kan lo hria a, he buaina hian thihna nasa tak a thlen thei reng a, refugee buaina pawh a awm ngei dawn.
“Ukraine mipuite tan ka ding nghet tlat a, global community ang pawhin tharum thawhna tawp nghal turin kan ngen tak meuh a ni,” a ti.
Hollywood star Asthon Kutcher chuan twitter lamah tawi fel takin, ‘I stand with Ukraine’ tih a ziak. A nupui leh filmstar lar ni bawk, Mila Kunis hi Ukrainian niin, Soviet Union-a an awm laia chhungte nena tlanchhia a, Los Angeles, US-a inbengbel ta an ni.
Angelina Jolie chuan, “Nang-mahni ang bawkin, Ukraine mipuite tan ka tawngtai a, tunah hian ka thawpui UNHCR (Refugee buai-puitu pawl lian ber) te nen mihring dikna leh chanvo rahbeha awm lova, himna tha zawk an neih theih-na tura tih theih zawng zawng ti turin hmalakna kan nei mek,” a ti.
Supermodel lar Gigi Hadid pawh a ngawi mai mai thei bik lo. “Rin phâk baka a tak thil thleng tuartute leh Ukraine tan ka thin a na ngawih ngawih. Putin-a chetna hi khawvela mipui rorelna ram te tan invauna a ni a, tihtawp nghal a ngai. Ukraine mipuite duhthlanna leh phu ngawih ngawih thil te pechhuaktu ramte hmalakna ka thlawp tlat a, an tan pawh ka tawngtai a ni. HANDS OFF UKRAINE,” a ti ve bawk.