Pakhat phawt, hmabak pathum

Liverpool in tun season a tualchhunga an trophy hmasa ber an chawi a. Carabao Cup final hmuhnawmah Chelsea lakah penalty shootout hmangin an chak.
English Football League Cup, sponsorship avanga Carabao Cup tia hming an vuahah hian Chelsea goalkeeper penalty pet dawna dah luh Kepa Arrizabalaga chuan a penalty pet hun a thlenin goal chungah a pet a. Blues a vanduai zawkah an \an phah.
Liverpool hian EFL Cup hi vawi 9 an chawina a ni a, England-ah record thar an siam.
An goalkeeper Caoimhin Kelleher chuan a penalty pet chu goal-ah khung thungin vawi 11-ah Liverpool in an khung vek a, Chelsea in vawi 10 an pet goal ve thung.

Goal pawm loh tamna inkhel hmuhnawm
Wembley Stadium a Pathianni zana inkhelah football hmuhnawm en tur a awm a. Champion tuma club pahnihte tactic sawisei tur a tlem.
Chelsea in goal vawi thum khung mahse offside avangin pawm a ni lo vek a. Romelu Lukaku offside tia an phar in sawi a hlawh. Midfielder Mason Mount chuan chance \ha tak vawi hnih a khung theih loh chu an tuar a. An tlarhnungah an goalkeeper Edouard Mendy chuan save \ha tak a siam a ngai leh \hin.
Liverpool in goal hlauhawm an insiam hnem a, anni pawhin Joel Matip hmanga goal an neih pawm loh an nei ve tho.
Kum 2012 hnua he inelna a la champion leh lo Liverpool hian inkhel \an dawnah midfielder Thiago Alcantara a inhliam avangin Naby Keita an dah luh a ngia a. Chelsea nen goal inkhung teuh chhawkin final hmuhnawm an khel a, chak tur zawnna atan penalty pet a ngai in team pahnihte khelh\hat a tilang chiang.

Goalkeeper pathum
Liverpool manager Jurgen Klopp-a’n a first-choice Alisson aiin kum 23 mi Caoimhin Kelleher a ring a. A tawp thleng a ring tlangin a ti fuh.
Penalty a khung bakah inkhelh laiin final boruak lianah a talbuai lova. Christian Pulisic goal khung tur a dan bakah huntawp dawnah Lukaku goal khung tur pawimawh a dansak.
Goalkeeper hmabak nei eng tak Kelleher hian minute 120 chhungin a penalty area a uap hneh a, a manager Klopp-a chuan khawvela no.2 goalkeeper \ha ber a ti hial.
Lehlamah Blues manager Thomas Tuchel-a’n risk a la a. Ti fuh lo mahse dem theih a ni bik lo.
Spanish goalkeeper in khawvela goalkeeper manto ber ni tura Chelsea a zawm hnuah a inkhelin sawisel hlawh chang awm leh \hin mahse penalty record a nei \ha a. Knockout inelna bikah Chelsea chhandamtu a ni fova. Blues a zawm hnuah penalty shootout-ah save vawi sarih a nei tawh.
Cup inelnaah huntawp dawn lamah a chet\hat \hin avangin Tuchel-a’n a ring ngam a mak lo.
Reds lakah erawh vawikhatmah a save loh bakah a penalty a khung lova, khel\ha Mendy zawk ven tlang tir se tia zawhna a awm thei ngei ang.
Chutihrualin Blues in tun season-ah England-ah Liverpool leh Manchester City te an elpha tih an lantir a. Trophy dang chawi turin theihna an nei tih an lantir bawk.

Eng nge an sawi?
Liverpool manager Jurgen Klopp chuan inkhel zawhah, “Kan hlawhtlin avangin ka lawm, chutihlaiin minute 90 chhungin 1-0 a chak ni ila ka lungawi hle ang. Tunlaia kan boruak karah hetianga lawmna tur kan fans te kan siamsak thei hi ka lawm.”
“Nilaini ah kan inkhel lehnghal dawn a, chuvangin inthlahdah hman kan ni lo. Kan mualah a nih avangin zanin vang hian mipui an phur anga, harsa deuh dawn mahse theihtawp kan chhuah ang.” tiin a sawi.
Chelsea boss Thomas Tuchel chuan, “Football hi infiamna ropui a ni a, zaninah inkhel ropui kan hmu bawk. Kan result duh ang ni lo mahse theihtawp kan chhuah avangin inchhirna tur awm lovin kan kalsan thei.”
“Kan theihtawp kan chhuah a, Romelu vanga goal pawm loh kha thutlukna siam awlsam lo tak a ni bawk a, an ti dik em tih ngaihtuah zui a awl. Vanneihna kan lamah a \an a ngai ve a, inkhelh pangngai hun chhunga draw result kan nei kha a awm viau.” a ti a.
Kepa chungchang sawi bawkin, “A hma in hlawhtling takin kan ti tawh \hin a, penalty save ah a \ha zawk \hin a, chuvanga thutlukna siam ka ni. Player 11 in an pet vek a ngaih hi a thleng zen zen lova, a rilru ti fim phawt lovin a pet hmanhmawh hret a ni ang.” a ti.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427