- Reuben Lalnunthara Hnamte
Isua kan tana a lo pianna leh min tlana hi thlasik anga khel lova kan hman thin a ni a. Kan la urhsunin a, Christmas te phei chu ruaipui nen a ropui thei ang berin kan lawm thin a ni. Good Friday leh Eastern sundayte pawh urhsun taka hmangin a thente phei chuan ruai nen hial kan hmang thin a ni. Christmas te phei hi chu kan lawm ropui ang ai hian thlarau lama hlawkna hmu ta hi sawi tur an tam lo viau maithei. Thalai tam takte phei chuan sualna bul tan nan leh nawmchen nan an hmang a ni ber zawk.
Hetia hunpui kan hman urhsun em em laia kan ngaihthah ang tih hlauhawm em em zawk chu Isua’n khawvela a awm chhunga, kum thum chhung chauha a rawngbawlna hi a ni. He kum reilotea a rawngbawlna hun chhung hian khawvela a lo kal chhan leh a thiltum chu a chiang em em mai a. Ama hnungzuitu kan intih mek lai hian he a rawngbawlna hnungzui lam hi ngaihthah theih tak mai a ni a. Tunlai tawngkam takah Lal Isua Manifesto thenkhat hi i han thlir ho dawn teh ang.
- Damlote a ngaipawimawh hle: Isua khan a rawngbawl chhung khan taksa lama harsatna, damlohna nei te tam tak a tidam a, mitthi hial pawh a kai tho a nih kha.
Harsatna neia a hnen pan tute reng reng tumah a tithlawn ngai lova, sakhua a thliar lova, mi rethei leh hausa a thliar hek lo; Amah mamawhtu a piangte, Amah rawn pantute chu a lo tidam zel a ni. Isua hian taksa damna leh hriselna a ngaihpawimawh zia a tichiang em em a ni. Kan taksa in a ngeih leh ngeih loh lam pawh ngaihtuah lova, duh duh kan eiin kan in a, kan hmuama, kan zu bawk a. Hei hi chu Isua duh dan chu a nilo tih a chiang a ni. Kan taksa in a ngeihlo tih kan hriatreng kan tih luih tlat emaw, kan ei luih tlat hian; ruihhlo avanga natna tuar emaw, boralte nen hian enge danglamna awm ang le? Vanduaina chu tuman kan pumpelh thei lo, mahse, kan natna tamber hi keimahni insiamchawp a ni. - Intluk tlanna a ngai pawimawh : Isua khan mi rethei leh hausa a thliar lova; angkhat vekin a en a ni. Harsatna tawk te, mi rethei leh damlote a khawngaihzia leh a ngaihpawimawh zia kan hmu a ni. Lal Isua khan inrahbehna lampang kha a haw hle mai a. Puithiam ho chapo lutuk leh inti lal lutukte kha a ngaithei miah lo tih kan hria a ni. Rethei rahbeha awmte kha a lainatin a khawngaih hle mai. Mihausa leh lazara chung changah pawh khan- mi hausa khan Hremhmun a tlak chhan tak chu sawilo mahse; Lazara, pan bawmkhah luk leh mi rethei tak a diriam dan kan han chhiar khan, kha kha hremhmun a tlakchhan ni a sawi a tum a ang hle a ni. A hauhsakna ringawt kha ava dem lova; thil sual dang a tih a tarlang bawk lo. A tarlan ber chu – a chapona leh mi rethei leh tanpui ngaite a diriam dan kha a ni.
Mi hausa ringawt kha Isua khan a rawn dovin, a rawn khak hran lo. Chu ai chuan mi chapo leh mahni aia hnuaihnung zawka langte rahbeh ching leh tiduhdahtute kha a duhlo hle tih kan hmu a ni. Kan ramah pawh hian mi rethei leh hausa inkar a hla sawt hle mai a. Nula /tlangval leh nupui pasal chung changah te, chhiatni that ni thlengin a hla tual tual tawh a ni. Hetia langsar vak lova a lan ai hian a nasa tawh a ni. Hei tak hi Isua duh loh em em chu a ni. - Mipa leh hmeichhia dinhmun : Muslim hote chuan a bik takin hmeichhia an dah hniam hle kan hria a. Hnamtin deuhthaw hian hmeichhia kan dah dan chu mipa ai chuan dang tak deuh vek a ni. Hmanlai kan pipute hunah pawh khan hmeichhia an en dan chu a dang hle tih kan hmu thin. Isua erawh chuan mipa leh hmeichhia kha inangkhat rengin a en tih theih a ni a. Samri hmeichhia, Jakoba tuichhunchhuah bula a biak te kha , a zirtirte meuh pawhin mak an ti. Chu a chhapah hmeichhe duk dak vak lo a nih hmel hle ai lehnghal a.
Hmeichhe uire lai tak an man, an tihhlum ngei ngei turte a chhanchhuak maite kha Juda puithiam ho chuan an helh hle a ni. Rahabbi nawhchizuarin a ke a hriak rimtui a chulh tumte pawh khan Puithiamho ngaihdan chu a nilo hle a nih kha. Isua khan inrahbehna leh indiriamna, intihduhdahna ang chi kha a haw hle mai a. Mi tupawh angkhatin a en vek a ni. Zoram ringtu intite pawh hian hengte hi kan thinlungah riak se la; Lal Isua hnung hi kan zui zo meuh em tih hi kan in enchain a pawimawh a ni. - Ram rorelna leh Pathian thu : Isua khan ram rorelna kha a duhloh thu emaw kan hre lo. Thuthlung hluiah pawh Israel lal turte chu Pathian ruat an ni thin a nih kha. Amaherawhchu, chawhpawlh kha a duhlo hle tih kan hmu a. Juda puithiam ten Isua tih kawlhawk tum a an rawn beih khan, Kaisara hnena chhiahchawi a thian leh thian loh an zawt a nih kha. Khata Isua chhan dank ha a fing hle a ni. Pathian thilte chu Pathian hnena pe a, Sorkar thilte chu Sorkara pe turin a hrilh mai a ni.
Isuan a sawi danah hi chuan “Politics chu Politicsin kal se la, Pathian thu chu Pathian thu a nih angin kal bawk rawh se” a tihna ni awm tak a ni. Kan ramah pawh hian kan kalkawp tir lutuk hian kan Pathian thu lak pawh hi a tidal zo tawh a ni mai angem? Roreltute chu kan thlawp anga, a tul ang zel a tawngtaipui emaw,thurawnte pawh kan pe tur a ni mai dawn lovem ni? Kan chawhpawlh lutuk ta hian rinna kawngah pawh min tidal zo tawh ni ber hian a lang. A kohhran ang zawngte hian intlansiakna kan nei ang tih hi hlauhawm tak a ni.
Tlangkawmna : Kan sawi tawh angin Isua hian a thina leh thawhlehna ngawr ngawr hi min hriattir a tum a ni ber lo va. Kum thum chhunga rawng a bawl chhung khan mihringte kan inrelbawl leh awm dan tur leh Pathian duh dan kan zawm dan tur te leh thil chi hrang hrang pawimawh tak tak min zirtir a ni. He a Manifesto ropui lutuk hi ram rorelna te, khawtlang leh kohhran thleng hian ava nuam dawn em!