Khawvel football thuneitu lian FIFA leh European football hotu UEFA te chuan Russian football club-te leh an national team chu an hnuaia eng inelna mah khelh pha lohna thu an chhuah.
Football thuneitu lian te hian Thawh\anni zan khan Russia in Ukraine a run avangin thutlukna an siam thu hi an sawi a. Thu leh awm hma chu an hnuaiah inelna an hmachhawn thei dawn lo.
He thutlukna avang hian Russia mipa football team chuan thla tharah World Cup play-off match a khelh tur a khel thei dawn lova. Hmeichhe team pawhin tun nipui a Euro 2022 an khel thei dawn lo bawk.
Club lamah Spartak Moscow chu Europa League a\angin hnawhchhuah an ni a. An round of 16 khingpui tur RB Leipzig chuan quarter-final an lut tlang ang.
Hei mai hi ni lovin UEFA chuan Russia sorkar hnuaia mi energy corporation Gazprom nena sponsorship an neih chu an titawp.
“He thu ah hian football hi a inlungrual a, Ukraine a indona tuar mipuite kan tawrhpui a, an lamah kan \ang.” tiin thuchhuah an siam.
“FIFA leh UEFA president te chuan Ukraine a thil thleng hian \hat lam a pan thuai an beisei a, football hi muanna leh hlimna hminga mipuite phuarkhawmtu a lo nih leh thuai theih an beisei.” tiin an sawi.
Russian football thuneitu RFU chuan FIFA leh UEFA thutlukna chu an pawm loh hulhual thu an sawi a, international sports inkaihhruaina zulzui a khinlet an tum thu an sawi ve bawk.