- HC Vanlalruata
Kan rual-ute’n tunhma a kan MLA-te chanchin ngaihnawm leh nuihzatthlâk ang reng tak tak an sawi ţhin khan beng a titlai-in kan nuihpui nasa hle ţhin a. An sawi pakhat chu (a hunlai ziak lang kher ta lo i la) kan MLA rualin ţawng lettu official hruai a India ram state ţhenkhat an fan ţum kha a ni a. An state tlawh pakhatah hian bawng ki sei pui pui an vulh ţeuhna hmun an tlawhpui a, MLA pakhat chuan officer hnenah chuan, “An bawng zingah hian a eng hi nge insîk huai ber,” ti a zawt turin a ti a. Officer chuan a hnial deuh na-in a tur luih avangin a zawt ta a. Bawng vulhtute zinga pakhat chuan, “Mizoram aţanga dan siamtu zahawm tak tak lokalte – kan bawng kan insiktir ngai lo,” tiin a chhang a ni, an ti.
Ţum khat leh chu Delhi khawpui-ah an kal a. Khatih laia Prime Minister Indira Gandhi kha an hmu thei hlauh mai a. Pi Gandhi hian Mizoram assembly palaite chu Mizoramah eng ang kawlphetha nge an siam chhuah a, an chhit tih a lo zawt a. A zawh danah pawh ‘hydro nge thermal’ a ti niin an sawi. An zinga lehkhathiam bera ngaih doctoral/doctorate degree nei chhun kha kan MLA-te chuan an en ta ţhap mai a ni awm e.
Ani lah khan helam hi a lo zir bik chiah lo ni ngei tur a ni, ‘thermal’ tiin a chhang ni awm tak a ni a. Indira Gandhi khan official ţhenkhat kovin Delhi khawpui bul hnai a tuitha hmang leh lei hnuai aţanga thil laihchhuah tha hmanga kawlphetha siamchhuahna hmun fanpui turin a tir ta hlawm niin an sawi. Khatih lai khan Aizawl khawpui-ah chauh eng pekchhuah a ni a, Electric Venga Power House kan tih thin, generator bak kha kawlphetha siamchhuah kan la nei lo.
Mizoramin keimahni puala assembly kan neih hma daih, August ni 4, 1957 khan Prime Minister Nehru khan Aspara an tih mai nuclear tha hmanga eng siamchhuahna chu a lo hawng daih tawh a. Tarapur Atomic Power Station (megawatt 210) chu kum 1969 October thla khan hman ţangkai a lo ni tawh bawk. Kan Minister/MLA pakhatin hmarchhak state pakhat chief minister-in a lo mikhualna a a láwm em avang a, “When you come to Mizoram, I will kill you pig,” a tihte kha rual-ute sawi kan hre pha ve a.
MLA/minister pakhatin Pi Indira Gandhi hnena, “Madam, we, the Mizo people, want to abide by your breast” (a sawi tum chu – ka pi, keini Mizoram mipuite chuan i awm nghenga awm reng hi a ni kan duh – tih a ni awm e) a tihte kha min ngaihtuah chhuahtir a ni. Hei hi Pi Indira Gandhi a tlak hnu, Congress (I) a din hnu a, amah dotu Congress lam an lo thlawp hman tawh hnu a a rawn sorkar leh tak si avanga an tlawn leh deuh hunlai vel a nih hmel e.
Hetih hunlai hian a hnam pum ang pawhin kan khawhawi kha a la zîm hrim hrim a, engemaw kawngah chuan kan aiawha kan thlante pawh kha an la hawi zau bik vak lo a ni tih a lang reng. Mizo zînga lehkhathiam a kan ngaih tam ber kha ramhnuai lamah an rammu bawk si nén, mi hman tlâk tak kha thlanchhuah tur an tam lutuk bik lo pawh a ni ang e. Chuti chung chuan kan aiawha kan thlan, ram leh mipui hmasawnna thawk tura kan beiseite’n hydro electric power leh thermal project te an hre hrang lo em em kha chu zia lo tak a ni tho mai.
Hei hi a bul ber pakhat chu British-in min chhuahsan hma kum, 1946-a political party din an phal hlim aţanga Mizote’n politics haitho kan khelh vang kha a ni awm e. Khawvel chu sawi loh India ram politics inlumlet dan pawh hre thiam pha meuh lo an nih avang khan ‘lal bán’ kha mipui sorkar tundinna ber emaw an ti tlat mai a. An ‘democracy’ kalphung ni awma an hriat chhun chu lal bán a, chumi hnu a VC inthlanna neih vel kha ni berin a lang. Chutih laiin Mizo lalte huatna lama che na deuh kha Mizo Union tana rinawm leh ram hmangaihtu ni-ah an inngai a, chuvang chuan politics hi inhuatna atana hman tur ni a ngaihna a hring a ni.
Chumai chu a la ni lova, a bul an ţan fuh loh avangin politics leh political party ruihchilhna-ah nasa takin an lut a. Ram leh hnam tana ţha tur aiin party ruihchilhna khan kan politics a kaihruai a. Chu ngei mai chuan, “Uţawk pawh ni se kan party candidate chu ka vote hrim hrim,” ti a, party ruihchilhna kha a hring chiang a ni. Hun a a inthlâk chho zêl ná a, he politics tui-nu tenawm tak hi kan tleng fai thei rih ta lova. Mipui vote hmuh theihna tur a nih miau avangin political party hruaitute chuan he party ruihchilhna thinlung hi tibo lova a awm chhunzawm zêl hi an duh hlé niin a lang bawk.
Tunah pawh hian inthlanna-ah hian political party ruihchilh zawngin vote kan la thlâk nasa hle a; a nih chiah loh pawhin inthlanna a tling a, sorkarna siam thei tura kan rin lam hi vote nuam kan la ti niin a lang. Political party zinga MLA ngah ber kha sorkarna siamtu tur an nih miau avangin hriat thiam loh lutuk ngawt theih chu a ni lo. Amaherawh chu, Mizo mipui hian party ruihchilh hauh lovin kan ram leh hnam hmabak atana ţha tur ni a kan hriat ţheuh hi thlang ta ţheuh i la chuan politics siamţhatna bul kan ţan tihna a ni ang.
Kan ram hruaitu tur, mipui mamawh dán siamtu tur leh hma kan sawn theihna atâna thawktu tur kan thlan kawngah hian party ruihchilhna rilru pu a vote kan la thlâk ta reng mai hi hmasawnna dáltu a ni. Kan party candidate a nih avang ngawta kan vote tlin hian kan vote chhuah fo chu kan state rorelna sang ber (assembly) inkhawmah ngei pawh ngaihtuahna fîm (rational thinking) nei lo tawp a, an party hruaitute fak-ar-ék chiam kha politics ber emaw titute an ţhu dul fo hi a ni. Ram leh hnam tana ngaihtuahna séng, thil chîk, inzir peih leh mahni chhia leh ţha hriatna hmang ngam kan mamawhna hi a la sâng reng mai zawng a nih hi.
Tunhma UT hunlai ang kha a ni tawh lova, kan MLA thlan chhuah zingah lehkhathiam tak tak, mi pangngai chunglam, anmahni kalna lama zirna sang tak tak zir thleng leh thiam bik neite pawh kan assembly inkhawmah an ţhu ta fur a. Mahse, kan aiawh tura kan thlan chhuahte hi an thiamna leh hriatna hmang thei lo leh hmang ngam lova, politics-a an pu ber ţheuhte tlawn ngai deuh reuhva an awm avang hian hma hi kan sawn mawh viau lawi chu a nih hi. Hetah hian eng sorkar hunah pawh, rorellai leh eptu lam an lém chuang lo.
Hemi piahlam pawh hi a la awm a. Ram leh hnam leh dinna bial tana tihtak zeta thawh aiin mitthi rál, damlo kan, ruang thawn haw tih vel hi kan MLA-te hian an hna ber tur emaw a tih tawh niin a lang a. Hei hi an vote zawnna, inthlan leha an tlin theihna atana pawimawh ber emaw an ti a, chutih rualin hetiang vel hi an laka bial mipuiin kan beisei phâk táwk vel pawh a ni tawh. Ram leh hnam tana an thawh ţhat lam hi mipuiin kan ngaih pawimawh phak miau loh chuan kan phû táwk MLA kan nei a ni ve mai e, tih bâk sawi tur a vâng hle.
Tuna budget session awm mekah pawh hian kan MLA-te hi khawi lama ţhu pawh ni sela, ram mipui aiawha budget chungchanga thusawi thei kan mamawhna hi a sâng zual ta hle a. Ram leh mipui hmangaihna tak tak thinlung nei, inzir peih leh thil chîk peih hi kan mamawh êm êm tawh a. An party awmna leh an hotu lawk mitmei vêng reng ringawt ni lo, mipui hamţhatna tur sawi pha, chutiang sawi thei tura inzir peih hi kan mamawh hle mai a. Inthlan a awm leh hma chuan anni bak hi kan aiawha ding awm chuang hek lo le.