Hmun ruka AYUSH Hospital sakna tur lungphum phumna leh AYUSH Health & Wellness Centre unit 24 hawnna chu nimin khan Union Minister Sarbananda Sonowal hovin Dawrpui Multipurpose Hall-ah neih a ni.
He huna khuallian, Chief Minister Zoramthanga chuan AYUSH lama Mizoramin theihna sang tak a neih thu sawiin, thlai leh hnim hrang hrangah Mizoram chu a hausa tih leh hetah hian damdawi atana tha hnimhnah pawh a tam viau tur thu a sawi a; Mizoram economy chu a ram chhunga Pathianin a pekte hmang chauh pawhin nasa taka invawrh thei a nih thu a sawi.
Zorama chuan AYUSH Ministry kaltlanga Mizoramah healthcare lama hmasawnna ruhrel din belh a ni tur chu lawmawm a tih thu sawiin, Ayush inenkawlna chu India sorkarin a ngaih pawimawh thu leh a enkawl tura India hmarchhak mi ngei a dah chu lawmawm a tih thu a sawi.
Khualzahawm, Ministry of AYUSH leh Ministry of Ports, Shipping & Waterways changtu, Sonowal chuan hmarchhak state-in theihna a neih hrang hrangte chu hai chhuaha hman tangkai chuan India ram chak chhan ni thei a ni tiin, sorkar laipui pawhin hmarchhak state-te tihhmasawn chu a ngaih pawimawh thu a sawi a. India ram a intodelh tura hmalakna, ‘Atma-nir-bhar Bharat’ kalpui mek tih sawiin, “Mizoram pawhin intodelh tura theihna tha tak tak a nei,” a ti.
He inkhawm kaihruaitu, Health Minister Dr. R. Lalthangliana chuan health & wellness centre hawn tak unit 24 bakah hian sorkar kum tharah unit 12 hawn belh tum a nih thu a sawi a, Mizoramah ramhmul damdawi chinna tur ram hectare 11,310-a zau a awm thu leh nursery pariat leh model nursery pahnih a awm thu a sawi.
AYUSH Hospital, khum 50 awmna tur hi Aizawl, Champhai leh Hnahthiala sak tur niin, khum 10 awmna chu Khawzawl, Saitual leh Hortoki a din tur a ni.
Health & wellness centre unit 24 hawnte chu – Ramhlun South, S Maubuang, Sakawrdai, Armed Veng North, Khatla, Venghnuai, Baktawng, Sesawng, Sakawrtuichhun, Keifang, Bungkawn, Ngopa, Khuangthing, Lawngtlai, Parva, Chawngte, Pukpui, Tuichawng, New Serchhip, Keitum, Chapui, Niawhtlang, N Thingdawl leh Darzo Sub-Centre-ah te a ni.