Union Minister for Ayush leh Ports, Shipping & Waterways Sarbananda Sonowal chuan Ministry of AYUSH chuan state sorkar leh mipuite puihnain Mizoramah nasa taka infrastructure lamah hmalak a tum thu a sawi.
Zan khat riaka Mizoram rawn tlawh, Sonowal chuan nimin tlai khan Aizawla Dawrpui Multipurpose Centre-a thuthar thehdarhtute kawmin, AYUSH Ministry-in Mizoramah nasa taka infrastructure lamah hmalak a tum thu hi a sawi a ni.
Mizoramah lui hmanga inkalpawhna lamah pawh hmalak a nih tur thu union minister chuan sawi bawkin, hemi hmang hian Kolkata leh Mizoram inkar kawng chu nasa takin a tawi phah ang a, bungraw phurh man a tlawm hle dawn tih a sawi.
Sonowal-a chuan Mizoram dinhmun sawi bawkin, “Mizoram chu in hruaitu, Pu Zoramthanga kaihhruaina hnuaiah nasa takin a thang mek zel a ni,” a ti.
Union minister chuan Prime Minister Narendra Modi chuan India hmarchhak state te a ngaihsak thu leh prime minister ni tawh zinga hmarchhak tlawh tam ber a nih thu a sawi.
Prime minister hian union minister dangte leh sorkar laipuia sorkar hotute chu hmarchhak state-te tlawh tam turin a hrilh vek tih sawiin, hei vang hian kum sarih kalta chhung khan hmarchhakah hmasawnna a tam hle tih a sawi bawk.