Kumina India rama Covid-19 thihpui tawh zinga 92% zet chu invenna la ve lo an nih thu sorkar chuan Nilaini khan a sawi.
“Vaccine leh zau taka mipui hnena pek hian mi za tel nunna a chhan a ni tih chiang takin a lang a. Vaccine hian ram chhunga Covid kai pung hluai tur pawh a veng a ni,” tiin NITI Aayog-a hriselna lam changtu member, Dr VK Paul chuan thuthar lakhawmtute hnenah a sawi.
Covid vaccine dose khat lak hian hri leng laka himna 98.9% a pe thei a, a dose hnihna lak hnuah erawh 99.3%-in himna a pe thei niin Indian Council for Medical Research Director General Dr Balram Bhargava chuan a sawi bawk.
India-ah hian chawlhkar khat liam ta chhunga sample endik atanga kai hmuh zat bi (positivity rate) chu 0.99% niin tunah hian damlo enkawl lai mi 77,000 vel an la awm.
Darkar 24 liam ta chhungin mi 6,561-in hri hi an kai tih hmuh chhuah leh hman a ni bawk tih health ministry-a Joint Secretary Luv Aggarwal chuan a sawi.
Ni khata Covid vanga thi zat hi India-ah hian a tlahniam chak hle a. February 2 leh 8 inkar khan ni tin mi 615 thi ziah ang a nih laiin chawlhkar liam ta erawh kha chuan ni khata mi 144 zel chauh thi ang a ni tawh a. “A vanglai atanga chhutin 76.60% zetin a tlahniam a ni,” tiin Aggarwal chuan a sawi.
Darkar 24 liam ta chhunga hri kai hmuh zinga a zahve zet chu Kerala, Maharashtra leh Mizoram state pathuma mite an ni a. State pakhatah chauh enkawl lai mi 10,000 chuang awmna a awm tawh a, a bak zawngah chuan mi 5,000 an awm tling tawh lo tih a sawi.
Hri leng thawh hnihnaah khan a ni 49-naah a vanglai thlengin a ni 68-na atangin kai hmuh zat a tlahniam tan.
Thawh thumna, Omicron variant darhah a ni 18-naah a vanglai thlengin a ni 24 atangin a tlahniam zui nghal niin sorkar chuan a sawi.