Manipur Congress chuan rorel lai, BJP chuan thuneihna an chan chhunzawm theih nan helte hnenah pawisa tam tham tak an pe niin an sawi.
Congress hian Ningani khan BJP kaihhruai sorkar chuan hel pawl thenkhat hnenah Rs vaibelchhe 16.6 a pe niin a sawi.
Hetianga BJP-in hel pawl hnena sum a pe hi ‘India-a inthlan dan kahmang bawhchhiatna’ niin a sawi bawk.
“Manipur sorkar hian hel pawl, dan pawna hnawlte hnenah 1/2/2022 khan Rs vaibelchhe 15.7 a pe a, 1/3/2022 khan Rs nuai 92.7 a pe leh bawk,” tiin Congress hruaitu hlun, Jairam Ramesh chuan a sawi.
“Heng sumte hi union home ministry-in a pek chhuah niin state sorkarin a tih a ni,” a ti bawk.
Ramesh chuan rorel lai, BJP-in tlangram district-a inthlan thawh khatna neiha pawisa a pe chhuak hian inthlan thianghlim leh dik a awmtir lo hle tih a tilang tih a sawi.
“Heng pawisate hi state sorkar hnuaia hna thawkten thla hnih zet hlawh an lak tawh loh laia tih a ni,” a ti bawk.
Congress hruaitu hlun hian sorkarin helho hnena sum a pek hian inthlan thawh hnihnaah pawh nghawng a neih ngei a rinawm hle niin a sawi bawk.
Thawh hniha inthlanna tur, Manipur-ah hian boruak a tang hle a, thawh hnihna hmabak mekah Nilaini zan khan Congress leh BJP mite chu an intibuai leh.
Party pahnih intihbuaina hi Kakching district-a Kakching Khunou-a zan dar 11:30 vela thleng a ni.
Buaina chhuakah hian lirthei 12 zet tihchhiat a ni a. Hengte hi two-wheeler pariat leh lirthei ke li nei pali a ni.
Buaina chhuakah hian mihring thi chu an awm lo va, hliam tuar zat pawh chiang taka hriat a ni rih lo.
Manipur-ah hian inthlan thawh hnihna hi Inrinnia neih tur a ni a. Tun tumah hian phaizawl lam district-ah neih a ni ang.
Inthlan thawh khatna kha Thawhtanni khan neih a ni tawh a, hemi tum pawh hian tharum thawhna tenau a thleng nual a ni.