Education Minister Lalchhandama Ralte chuan April atangin academic session thar chu offline-a kalpui tan a nih tur thu leh private sikulte chu an ruahman anga tuition fee lak phalsak an nih tawh tur thu House a hrilh.
March 2, 2022-a a demand sawihonaah a hmawr bawktuah tangin Lalchhandam Ralte chuan academic thar chu thla thar April ah tan a ni leh dawn a. Pathianin zah a ngai anga, hri pawh a kiam lam pan turah kan ngai. Sikul tan hunah offline-in sikul kal pangngaiin kan kalpui tawh dawn a ni,” tiin, nu leh pa te, zirtirtu te, zirlaite lo inbuatsaih a, hri laka himna tura inkaihhruaina SOP vawng tah chunga kalpui tum a nih thu a puang.
“Chief minister-in ‘hmasawn tura kal a ngai tawh a, inkharkhip ringawta naupang sikul kal duh tawh pawh kal tir thei loa awm reng hi a remchang tawh lo e. Offline-a sikul kalpui ngei turin inruahmang ang’ a tih avangin, education dept kaihhnawih zawng zawngte pawhin, offline-in kan kal dawn tih hi min hriatpui kan duh a ni,” a ti.
Academic session thar April-ah tan a nih hnuah private sikulte chuan tuition fee a full-a lak an phalsak tawh thu thu sawiin, “Private sikulte hi Mizoram education-ah chanvo pawimawh tak luahtute an ni. Hripui avangin harsatna tam tak an tawk a, sikul kal mumal theih loh avangin fee zaa 50 leh zaa 70 bak la lo turin kan ngen a. Harsa ti tak chungin, in luah man leh zirtirtute hlawh pek a ngai si. Kan control a, thuawih takin sorkar thawhpui leh mipui economy hrethiam chungin an inphah hniam thei a ni. Amaherawhchu, academic session thar tan a nih hunah, anmahni ruahman angin sorkar control rate pangngaiah a full-a tuition fee an lak hi kan phalsak tawh dawn a ni,” a ti bawk.
Education minister hian private sikulte chuan tuition fee an lak ve tawh dawn thu sawiin, “Tuition fee a full-a an lak loh chuan an dam khaw chhuak zo dawn tawh lo a. Chuvangin, kan ram education-a hmun pawimawh tak changtute tan kawng kan hawng dawn a ni,” a ti a. Academic session thar hawn a nih hunah sorkar sikul tha tak takah admission te, uniform te, tuition fee te chu a thlawna an pek tur thu a sawi.
Sorkar flagship programme SEDP scheme hnuaiah academic session tharah chuan high sikul, middle sikul leh primary sikul-ah te SEDP zirtirtu eng emaw zat pek leh a ni dawn tih a sawi a. A theih chin chinah a khaw mi ngei rawih an nih theihna tura ruahman a nih thu sawiin, “In duh zawng zawng kan tihsak thei lo ang che u. Amaherawhchu, in harsatna tam zawk hi sutkian leh tumin academic tan hma hian sutkian kan tum a ni,” minister hian a ti.
Sorkar sikul-ah zirlai an pung tih sawiin, hun hmasa lam sorkar sikul tam tak zirlai awm loh avanga khar leh sikul tam tak sawihkhawm ngai khawp a awm thu a sawi a. Tun ministry hnuaiah chuan an thu dawn tam ber pawh zirlai naupang ngah avanga class room-ah leng lo a, room tihzauhna tur ngenna directorate lamin an dawn tam ber a nih thu a sawi bawk.