Autonomous district council (ADC) hruaitute warrant/order of precendence tidanglam tura sorkar an dilna chu tihhlawhtlin a la ni lo a, sorkarin hun remchang hmasa berah ngaihtuah a tum.
Mizoram sorkarin August 11, 2020-a lal dan indawt, order of precendence a tichhuak a, he order siam tha turin hruaituten sorkar an lo ngen tawh thin a, tun thlengin ADC hruaitute duhna hi tihhlawhtlin a la ni lo a ni.
Assembly session neih mekah Congress member, KT Rokhaw zawhna ziaka chhangin District Council & Minority Affairs department changtu, R Lalzirliana chuan ADC hruaituten order of precendence tidanglam tura an ngenna chu tihhlawhtlin a la ni lo tih sawiin, “Order of precendence hi revise a la nih loh vang a ni,” a ti.
ADC hruaituten an dilna hi engtikah nge tihhlawhtlin a nih ang tia KT Rokhaw-in a zawhna chu chhangin, “Sorkarin an dilna hi a remchang hmasa berah ngaihtuah a tum,” tiin a sawi.
Tar lan tawh thin angin ADC hruaitute chuan he order-ah hian ADC Leader te chu rank hniam tete-a dah an ni tih leh he order hi an duh lo a, an dodal tih an lo sawi tawh.
Mara Autonomous District Council (MADC) sorkar chuan order of precendence an duh loh zia lantir nan Independence Day leh Republic Day chu a hranin an lo hmang tawh thin a, kumin Republic Day pawh kha a hranin an hmang a ni.