Russia-in Ukraine a rûn mek avangin he rama tangkhan Indian 10,800 vel an thenawm ram atangin Operation Ganga hmangin hruai haw an ni tawh tih sorkar chuan Zirtawpni khan a sawi.
Indian tangkhangte hruai haw hna hi Indian Air Force C-17 thlawhna pathum leh passenger phur thlawhna 14 hmanga neih niin Zirtawpni zan khan thlawhna pakhat dang a thlen belh leh beisei a ni.
Hetih lai hian Russian IL-76 thlawhna pahnih pawh Indian-te hruai haw turin Moscow-ah inrintir a ni tawh bawk a. Indian-te hi Ukarine hmarchhaka Kharkiv leh Sumi atanga Russian khawpuiah thlen phawt an ni ang a, phurh haw zui tura ruahman a ni.
Sorkar chuan C-17 thlawhna hmang hian mi 630 phurh haw tawh an ni a. Passenger phur chi hmangin mi 9,364 phurh haw an ni tawh bawk a. IAF thlawhna pasarih hmangin Indian 1,428 hruai haw tawh niin heng thlawhnate hi Uktaine-a chhawmdawlna thil tonne 9.7 phur luttu niin mihring an phur haw leh a ni.
Zirtawpni bikah pawh khan passenger phur thlawhna eng emaw zat hmangin Indian-te hi hruai haw leh an ni a. Bucharest (Romania) atangin pali, Kosice (Slovakia) atangin pahnih, Budapest (Hungary) atangin pali leh Rzeszow (Poland) atangin pathum an ni a. IAF chuan Bucharest atangin thlawhna pahnih leh Budapest atangin pakhatin a phur haw bawk.
Inrinniah pawh thlawhna dang tirh zel an ni dawn a. Passenger phur thlawhna 11 hmangin mi 2,200 vel hruai haw theih an nih beisei a ni a, heng zinga thlawhna 10 hi New Delhi-a tum tur niin pakhat hi Mumbai-a tum tur a ni.
Thlawhna panga hi Budapest atanga thlawk chhuak tur niin Rzeszow atangin pahnih leh Suceava atangin pali a ni dawn.
C-17 thlawhna pali chuan Zirtawpni zan khan Romania, Poland leh Slovakia an pan leh bawk a. Heng thlawhnate pawh hi Pathianni vela India pana thlawk let thei tura beisei an ni.
Kerala-a mi, a nupui nau pai lai nena Kyiv-a tang ve, Operation Ganga hmanga Indian embassy staff-ten an lak chhuah chuan hima an chhuah avanga a lawm em avangin an nau hrin tur hmingah phuah tel hial a duh thu a sawi.
Abhijit-a leh a nupui hi Poland-a Rzeszow thlenpui niin Poland-a Indian Embassy-in shelter room a siamah an awm tawh.
ANI-in Poland-Ukraine ramria an awm laia a biaknaah Abhijit-a chuan indona rapthlak tak atanga hima an chhuak thei chu a hlim tak zet tih a sawi.
“Ka nupui chu Poland-a damdawi inah a lut zui a. Thla kaw mi nau a pai mek a, damdawi in atanga thu ka hriat hnuhnung berah chuan ka nupui leh naute pawh a tha a. March 26 hi nau kan neih hun tura kan beisei a ni a, tha taka kan nei thei a nih chuan Ganga hming hi chawi ka duh a ni,” tiin Abhijeet hian ANI a hrilh a. A nupui hi chetsawn vak chi a nih rih loh avangin damdawi inah a la awm a, amah hi India-ah a lo haw rih a ni.
Abhijit-a hian Kyiv-ah thingpui dawr a nei a, indona a chhuah tak avangin hmanhmawh takin Ukraine atanga lak chhuah an ngai a ni.
“Thingpui dawr te reuhte ka nei a. Kyiv-ah khan tangin thuneituten Operation Ganga hnuaia hma an lakna atanga lak chhuak niin him takin Poland ka thleng a. India sorkar chungah pawh ka lawm hle a ni,” tiin Abhijit hian ANI a hrilh.
“Kyiv atanga Poland (Rzeszow) thlen nan cheng khat pawh ka inseng lo,” tiin a lawmzia a sawi uar hle.