Pakistan hmarthlang lam, Peshawar khawpuiah Zirtawpni khan Shia mosque-ah bomb chak tak puakin inkhawm lai mi 30 vel an thi a, tam takin hliam an tuar bawk a, thenkhat chu an na hle.
Peshawar khawpui hlui zawka Kucha Risaldar mosque-a hian an sakhaw tih dan pangngaia Zirtawpni tawngtai inkhawm neih laiin bomb hi a puak a ni.
Peshawar police chief Muhammed Ejaz Khan chuan tharum thawhna hi ralthuam keng mi pahnihin mosque pawna police ding an kah atanga a intan thu a sawi.
Inkahnaah hian a beitu pakhat zawk leh police pakhat a thi a, police dangin hliam a tuar bawk a. A beitu pakhat zawk hi mosque-ah tlan lutin bomb a tipuak ta a ni.
Mosque bul chiaha dawr nei pakhat chuan, “Silai puak vawi nga vawi ruk vek ka hria a, mosque chhunga thihchilh bomb tipuaktu tlan lut lai ka hmu zui a, na takin a puak zui ta a ni,” tiin Al Jazeera a hrilh.
“Ka in kawngkharte pawh a inhawng lawp a, leiah ka tl a. Mosque ka va luh ve chuan mei khu leh vaivut leh thisena bual mihring tlu phung ka va hmu a ni,” a ti.
Bomb disposal unit chuan bomb puak ta hi kg 5 chuanga rit a nih an ring a, ball bearing an hmang tel bawk niin an sawi a. Ambulance-te hmanhmawh taka thlengin hliam tuarte chu Lady Reading Hospital an panpui.
He thil thleng hi eng pawl mahin an tihah an la chhal lo.
Mi 60 chuang hliam tuar an awm a, thi hi an pun a rinawm hle niin damdawi in thupuangtu, Mohamed Asim chuan a sawi.
“Kan la buai hle a, hliam tuarte chu damdawi inah kan la a. Kan chhui tan nghal a, tuna a lan danah chuan thihchilh ngei niin a lang,” tiin police officer Mohammad Sajjad Khan chuan a sawi.
Bomb tihpuah a nih lai hian mosque chhungah hian inkhawm mi 150 vel an awm niin hmutute chuan an sawi.
Prime Minister Imran Khan chuan he thil thleng hi a dem thu a sawi.
Tun hnai thla eng emaw zat chhung hian Pakistan-ah hian tharum thawhna a thleng nasa hle a. Afghanistan nena an inrina bawrah army outpost beih fo niin sipai tam tak an lo thi tawh.
&&&&&